Albisteak

ITSASOTIK HERRIRA ekimenaren 2. edizioa aurkeztu du Urola Kostako Udal Elkarteak

Urriaren 11n eta 12an egingo da aurtengo edizioa, Zarautzen, eta eskualde osoari zuzenduta.

Iaz eskualdeko bost herrietan antolatu ziren ITSASOTIK HERRIRA jaialdiko ekitaldiak, baina aurrerantzean herriz herri txandaka egitea erabaki dute antolatzaileek. Aurtengo jaialdia, beraz, Zarautzen egingo da eta datozen urteotan eskualdeko gainerako herrietan, txandaka.

‘Ingurumenaren uberan’

Aurtengo jaialdian ingurumena izango da gaia. “Ingurumenaren uberan” goiburu hartuta, egitarauko proposamen guztiak, nolabait, ingurumena gaitzat hartuta osatu dira. Esaterako, artista eta sortzaile batzuk ingurumena inspirazio-iturri izan duten bitartean, beste ekimen batzuk ingurumena zaintzearen garrantziaz sentsibilizatzeko garatu dira.

Udalbatzarrak ohiko bilkura egingo du ostegunean, irailak 26

Bilkura udalbatzarraren aretoan izango da, udaletxean, eta 19:30ean hasiko da. Gai hauek aztertuko dira:

1.- Irakurri eta onartzea, egoki bada, udalbatzarraren 2019ko uztailaren 4ko ezohiko bilkurako aktaren zirriborroa.

2.- Onartzea, egoki bada, Udal Aurrekontu Propioaren 5/2019 zenbakidun kreditua aldatzeko espedientea, kreditua transferitzeko modalitatean.

3.- Onartzea, egoki bada, Udal Aurrekontu Propioaren 6/2019 zenbakidun kreditua aldatzeko espedientea, kreditu gehigarrien modalitatean.

San Nikolas festak antolatzeko bilera asteazkenean izango da, 19:00etan Kultur Etxean

Datorren irailaren 25ean, asteazkenarekin, bilduko da San Nikolas jaietako festa-batzordea Kultur etxean, 19:00etan. Kultura sailak herriko kultur, kirol eta beste alorretako eragileak gonbidatu nahi ditu aurtengo San Nikolas festak elkarrekin antolatzeko.

Bilera honenaz gain, datozen bi bileretarako datak ere finkatu ditu Udalak: urriaren 9a eta urriaren 23a. Bilera guztiak kultur etxean egingo dira, 19:00etan.

Udalbatzarraren bilkurak bideoan zuzenean ikusi ahal izango dira hemendik aurrera

Udalak erabaki du aurrerantzean bideoan grabatuko dituela udalbatzarrak, interesa dutenek etxetik ikusteko aukera izan dezaten, zuzenean, streaming bidez; ala ondoren, Udalaren webgunean.

Udalak aho batez hartu du erabaki hori.

Erlo Telebistan eta internetez

Horretarako, Udala harremanetan jarri da Urolako Komunikazio Taldea kooperatibarekin eta haren esku geratuko dira alderdi teknikoak: Erlo telebistako teknikariak etorriko dira udalbatzarrak grabatzera eta zuzenean emango dituzte, streaming jario baten bidez.

Etxean Erlo telebista sintonizatzen dutenek bertan ikusi ahal izango dute, eta, aukera hori ez dutenek, berriz, Udalaren webgunean (orio.eus) edo Karkara aldizkariarenean (karkara.eus) izango dute aukera.

Zaragueta eskolako ikasle eta irakasleak udaletxean izan dira, mugikortasuna hobetzeko neurriak eskatzen

Zaragueta eskolan mugikortasun jasangarriaren astea egiten ari dira, urtero bezala, eta, horren barruan, udaletxera jo dute gaur, irailak 18, beren gogoetak eta eskaerak alkateari planteatzera.

Anuska Esnal alkatea berekin bildu da udaletxearen atarian eta haien eskutik jaso du proposamena, aztertu eta kontuan hartzeko konpromisoa hartuz.

Mugikortasun jasangarriaren bidean

Gero eta gehiago dira eskolarako joan-etorria bizikletaz, patinetez edo oinez egiten duten ikasle eta irakasleak. Batetik, garraioak ingurumenean daukan inpaktuaz jabetzen direlako eta, bestetik, jarduera fisikoak onurak dakartzalako.

Joxe Etxeberria Iñarrak balea-arrantza irudikatzen duen tailla bat eman dio Udalari

Joxe Etxeberria oriotarrak zura lantzen eman du bere bizitza profesionala, Arin y Embil enpresan, eta bere kasa ere aritu da taillak eta egur-lanak egiten. Egin dituen lanen artean 80x40cm-ko tailla bat dago, balearen arrantza irudikatzen duena eta tailla hori Orioko Udalari eman dio dohaintzan, zurez egindako marko taillatu batekin batera.

Udalak, egindako dohaintza eskertzearekin batera, udalbatzarraren aretoan jarri du Joxe Etxeberriaren tailla, eta, horrekin batera, XVI. mendeko bi baleazale oriotarrek Ternuan idatzitako testamentuen lehen orriaren kopiak jarri ditu. Testamentu horiek Amerikan idatzitako dokumentu zaharrenetakoak dira eta Gipuzkoako Protokoloen Artxibo Historikoan jasota daude.

Argazkian Joxe Etxeberria eta Anuska Esnal alkatea ageri dira, Udalak Joxeri esker ona adierazteko egindako ekitalditxoan, dohaintzan emandako tailla atzean dutela.