Albisteak

Orioko herriak ez ditu betetzen baldintzak herritarren kalera ateratzeko ordu-tarteak bertan behera uzteko

BOEn gaur bertan argitaratu den aginduan Gobernuak zehaztu du 10.000 biztanletik beherako herriek 100 biztanle/km2-tik beherako dentsitatea eduki behar dutela, herritarren kalera ateratzeko ordu-tarteak bertan behera utzi ahal izateko (Oriok 624 biztanle/km2-ko dentsitatea du, eta ez du, beraz, baldintza hori betetzen).

Hautesle-errolda ikusgai dago udaletxean, kontsultak egin eta erreklamazioak aurkezteko

2020ko uztailaren 12an egingo diren Eusko Legebiltzarrerako Hauteskundeak direla eta, jendaurrean daude dagoeneko hautesleen zerrendak (bai Orion bizi direnena eta bai atzerrian bizi baina Orion erroldatuta daudenena).

Haurreskolan izena emateko epea maiatzaren 21etik ekainaren 8ra izango da

Haurreskolan matrikulatzeko epea datorren maiatzaren 21ean zabalduko da eta irekita egongo da ekainaren 8ra arte.

COVID-19a dela-eta bizi dugun egoerak eraginda, bi modutara egin ahal izango da matrikulazioa aurten:

• On-line (www.haurreskolak.eus webgunean)
• Haurreskolara bertara joanda. Bigarren kasu honetan, epea laburragoa da: ekainaren 1etik 8ra, 09:00etatik 14:00etara.

Gipuzkoako Ur Kontsortzioak ezohiko neurriak hartu ditu, herritarren zailtasun ekonomikoak arintzeko

Gipuzkoako Ur Kontsortzioaren Batzorde Exekutiboak zenbait neurri hartu ditu, COVID-19aren osasun-larrialdiak eragindako ondorio ekonomikoei aurre egiteko. Bereziki, egoera ahulean dauden familiak, langile autonomoak eta enpresak hartu dituzte aintzat.

Udalak 30.000 euroko dirulaguntza emango dio Urolako Komunikazio Taldeari

Orioko alkateak eta Urolako Komunikazio Taldearen (UKT) ordezkari Uxua Ostolazak lankidetza-hitzarmena sinatu dute gaur goizean, udaletxean. Horren arabera, Udalak 30.000 euroko dirulaguntza emango dio aurten UKT kooperatibari, eskualdean euskarazko komunikazio-zerbitzuak garatu eta emateko.

Karkara Taldeak eta eskualdeko beste komunikabide batzuek elkar hartuta, UKT kooperatiba osatu zuten iaz. Geroztik, kooperatiba hori bihurtu da gure eskualdeko komunikazio-talderik garrantzizkoena. UKTk hainbat idatzizko komunikabide argitaratzen ditu euskaraz eskualdeko herrietan: Karkara, Uztarria, Baleike, Hitza egunkaria… eta bere baitan du, baita ere, Erlo telebista, ikus-entzunezko alorrean.

Dendari eta tabernariek bete beharreko baldintza batzuk aldatu egingo dira deskonfinamenduaren 2. fasean

Gauzak ondo bidean, deskonfinamenduaren 2. fasean sartuko da EAE datorren maiatzaren 25etik aurrera. Hala baldin bada, horrek aldaketak ekarriko ditu herriko dendari eta tabernarien jardunean, orain arte baino baldintza malguagoak izango dituzte-eta.

Dagoeneko 2. fasean dauden eremuetan aplikatu diren neurriak kontuan hartuta, aldaketa nagusiak hauek izango dira (betiere, dekretuak zehaztuko duenaren eta Eusko Jaurlaritzak ezar ditzakeen bestelako neurrien zain):

• Dendetan aforoaren %40 onartuko da (1. fasean %30 zen), betiere bi metroko segurtasun-distantzia mantentzeko modurik baldin badago.
• Taberna eta jatetxeetan aukera izango dute lokalaren barruko mahaietan zerbitzatzeko (orain arte terrazatan bakarrik zerbitzatu behar zuten), aforoaren %40 arte.

Zorionak dendariei

Udala pozik dago herriko dendariek ateak irekitzeko eta zerbitzua emateko egiten ari diren ahaleginagatik, eta zorionak eman nahi dizkie ezarritako segurtasun- eta higiene-baldintzak zorrotz eta arduraz betetzen ari direlako.