Albisteak

Abenduko kultur agenda aurkeztu du Udalak

Udalak prentsaurrekoa eman du goizean, abenduko kultur jardueren agenda aurkezteko. Prentsaurrekoa 11:30ean egin da eta bertan izan dira Xabier Ibarguren kultur zinegotzia, Julen Alonso musikari oriotarra eta Uhaina Atxotegi kultur teknikaria.

Prentsaurrekoan, Xabier Ibargurenek nabarmendu nahi izan du «Udal-gobernuak, kulturaren alde egoteaz gain, kulturaren alde egiteko pausoa ere eman nahi» duela, eta horretara datorrela abenduko kultur jardueren agenda. «Hizkuntzak eta kulturak egiten gaituzte herri eta, egoera zail honetan, mahai gainean jarri nahi dugu kultura segurua dela eta beharrezkoa dela. Ahal dugun neurrian, horretan ere arnasgune izan nahi dugu, kulturak aberastasuna eta osasuna ere ematen baitu, arlo guztietan. Eta hori da herriari eskaini nahi dioguna».

Euskaraldiko txapak kultur etxean banatuko dira azaroaren 16tik 20ra

Datorren ostiralean, azaroak 20, hasiko da aurtengo Euskaraldia, eta izena eman dutenek aste honetan jaso ahal izango dituzte Ahobizi eta Belarriprest txapak, kultur etxean.

Goizean, kultur etxeko atezainak banatuko ditu txapak eta arratsaldean, berriz, Orioko Euskaraldiko lantaldeko kideak arduratuko dira. Banaketa kultur etxeko areto nagusian egingo da, segurtasun-arauak beteta eta distantziak zainduta. Jende-pilaketarik ez gertatzeko, areto nagusiko bi ateak erabiliko dira: bat sartzeko eta bestea ateratzeko.

BBK Mendifilm jaialdiko lau film labur proiektatuko dira Arraunetxen azaroaren 27an

Urteak dira Talai Mendi elkarteak BBK MENDIFILM jaialdiko film laburrak proiektatzen dituela Orion. Jaialdia urtero egiten da eta, ondoren, aurkeztu diren film onenak herriz herri zabaltzen dira Menditour izeneko ekimenaren bidez.

Aurten, guztira, lau film labur proiektatuko dira azaroaren 27an, ostiralarekin, 19:00etan hasita. Kartelean ikusi daitezke proiektatuko diren filmak.

Zarauzko Garbigune berriaren obraren finantzaketa onartu du Urola Kostako Udal Elkarteak, aho batez

Garbigune berria izango du Urola Kostak 2022ko lehen seihilabetean. Pasa den astelehenean (azaroak 9) egindako Zuzendaritza Batzordean onartu da Zarautzen eraikiko den Garbigunearen obraren finantzaketa; aho batez, EAJren eta EH Bilduren aldeko botoekin.

Ido abeslariak kontzertua emango du Arraunetxen azaroaren 20an

Idoia Asurmendi «Ido» abeslari aramaioarrak kantaldia egingo du Orion azaroaren 20an, ostiralarekin. Kontzertua 19:00etan izango da, Arraunetxeko aretoan.

Kontzerturako sarrerak aldez aurretik hartu behar dira, 2 euro ordainduta. Aforo-mugak direla-eta, 80 sarrera daude saltzeko eta dagoeneko erosi daitezke kultur etxean. Pertsona bakoitzak bi sarrera erosi ditzake, gehienez.

Erosi 40 euroko bonua eta egin 60 euroko erosketa Orioko dendetan!

Orioko Udalak martxan du merkataritza suspertzeko kanpainaren bigarren txanda, eta dagoeneko erosketa-bonu asko saldu ditu, turismo-bulegoan (Pilliku plazan, Goiko kalean). Oraindik geratzen dira bonuak erosteko.

Herritar bakoitzak erosketa-bonu bat erosi dezake, 40 euroan eta, ondoren, 60 euroko gastua egin ahal izango du ekimenera atxikitutako herriko establezimenduetan (ikusi zerrenda behean). Udalak jartzen du 20 euroko diferentzia bonu bakoitzean, herriko dendak laguntzeko. Ez dago zertan bonu osoa denda bakar batean gastatu: aukera dago 15 euroko lau erosketa egiteko, toki berean ala lau toki desberdinetan.