«Oreka TX» taldearen emanaldia izango da ostiralean Herriko Plazan

Traducción automática al castellano

Abuztuaren 7an, ostiralarekin, «Oreka TX» taldeak kontzertua emango du Orioko plazan, 20:00etan hasita, udako kultur programazioaren barruan.

Sarrera doan izango da, baina aforoa mugatu egingo du Udalak: ikusleentzako esparrua mugatuta egongo da eta ikusleek eserita egon beharko dute, nor bere aulkian, distantziak zainduta eta maskarak jantzita.

Oreka TX taldearen azken lana

«Koklea» lana aurkeztuko du Oreka TX taldeak Orion. Iaz kaleratu zuten lana da eta, pandemia dela eta, aurten ez dute toki askotan emateko aukerarik izan.

Oreka TX txalaparta taldea da. 1997an sortu zuten Harkaitz Martínez eta Igor Otxoa musikariek. Hasieran Kepa Junkeraren bandarekin ibili ziren eta artista ezagun askorekin jo dute: Carlos Nuñez, La Bottine Souriante, Aziza Brahim, Taraf de Haidouks, Dulce Pontes, Phil Cunningham, Manu Dibango edo Pat Metheny, adibidez. 2006an Nömadak TX egitasmo zabala aurkeztu zuten; horren barruan dokumental bat, disko bat eta bi zuzeneko emanaldi daude: Karpa Nömada eta Nömadak TX Zuzenean.

Hauek dira Oreka TX taldea osatzen duten musikariak:

  • Harkaitz Martinez de San Vicente eta Mikel Ugarte - harrizko txalaparta, egurrezko txalaparta, pitak, tututofonoa, kanaberak, tokoia
  • Mixel Ducau - alboka, albokotea, saxofoia, klarinetea
  • Iñigo Egia - tabla indiarra, kajoia, kalabazak, bendhirra, tara, platerak, bodhrama, hang-a
  • Juanjo Otxandorena - bouzoukia, baxua

Webgune honek cookie propioak eta besteenak erabiltzen ditu, nabigazio zerbitzuak hobetzeko asmoz. Nabigatzen jarraitzen baduzu, gure cookieen politika onartzen duzula ulertuko dugu.