'Arinmak' dantza-ikuskizuna emango du Harribil taldeak ekainaren 23an

Ekainaren 23an urteroko sanjoanetako emanaldia egiteko partez, ARINMAK izeneko dantza-ikuskizuna emango du aurten Orioko Harribil dantza-taldeak.
2014az gero ibili dute buruan Harribil taldekoek lan berria prestatzeko ideia eta aurten, lan handia eginda, aurkeztuko dute jendaurrean Karela kiroldegian. Ilusio eta gogo handiz landu dute emanaldia eta ARINMAK izena jarri diote. Estreinaldia ekainaren 23an egingo dute Orioko Karela kiroldegian, gaueko 22:00etan.

Hasteko, Harribileko dantzariek San Joan Berdeko ohiko kalejira egingo dute haurrekin, 21:00etan hasita eta, bukaera ikastola aurreko plazan emateko partez, kirolegian emango diote, dantza-ikuskizunarekin lotzeko.

Sorginak ardatz

Emanaldiko koreografiak Harribileko dantzariek sortu dituzte, euskal dantza tradizionala eta gaur egungo joerak uztartuz. Sorginak dira ikuskizunaren ardatza. Tradizioan sorginak pertsona gaizto moduan irudikatu izan dira beti; baina, emanaldi honen bidez, Harribileko dantzariek buelta emango diote historiari.

Sarrerak 5 eurotan salgai

Emanaldirako sarrerak 5 eurotan daude salgai. 10 urtetik beherakoek ez dute ordaindu beharko; baina beharrezko izango dute sarrera.

Sarrerak toki hauetan erosi daitezke: Orioko Errusta eta Gure Txoko tabernetan, Karela kiroldegian eta Soia arropa dendan.