Udalbatzarrak EUSKARALDIArekin bat egitea eta sustatzaile izatea erabaki zuen ekaineko bilkuran

Aho batez hartu zuen erabakia udalbatzarrak, alderdi politiko guztien aldeko botoarekin. Beraz, zinegotzi guztiak agertu dira prest EUSKARALDIA bultzatzeko eta, era batera edo bestera, ekimenean parte hartzeko.
Udalak onartutako adierazpenaren proposamena Gipuzkoako Foru Aldunditik etorri da eta Gipuzkoako herri gehienetan onartuko da. Urola Kostako Udal Elkarteak ere ekainean onartu zuen adierazpena.

Hau da, hitzez hitz, Udalak onartutako adierazpenaren testua:

EUSKARALDIA UDAL BARRUAN SUSTATZEKO ERAKUNDE-ADIERAZPENA

Gipuzkoan bi hizkuntza ditugu ofizialak: euskara eta gaztelania. Begi bistakoa da, ordea, bi hizkuntzok ez daudela oreka egoera batean, ez esparru publikoan ez eta gizartean ere: gaztelania da nagusi. Uste dugu orain arteko ahaleginarekin bakarrik ez direla bi hizkuntzak parekatuko, indar gehiago jarri behar dugula hizkuntza berdintasuna bultzatzeko; euskara lehenetsi behar dugula, alegia. Izan ere, gizarte-, genero- eta hizkuntza-berdintasuna lortzea da Gipuzkoako Foru Aldundiaren eta Gipuzkoako udalen erronketako bat, eta, horrenbestez, horretara bideratutako urratsak egitea behar beharrezkoa da.

Ildo horretatik, guztion elkarlanari esker, euskararen normalizazio-prozesuak azken hamarkadetan egin duen ibilbidea oparoa izan da eta emaitza begi bistakoa; egindako bidea ez da makala, baina, prozesu guztietan bezala, baditu pozik egoteko eta kezkatzeko arrazoiak.

2016. urtean egindako VI. Inkesta soziolinguistikoaren arabera, ezagutza datuek nabarmen egin dute gora azken hamarraldietan, baina erabilerak ez du neurri berean gora egin; izan ere, Gipuzkoan bizi den 2 urte edo gehiagoko biztanleriaren % 57,4 euskalduna da eta biztanleen % 73,3k euskara ulertzen du. Erabilera-datuek, aldiz, diote Gipuzkoan 16 urtetik gorakoen % 39,5ek hitz egiten duela euskaraz.

Orion, biztanleriaren % 76,68 euskalduna da eta % 85,85ak euskara ulertzen du. Erabilera, aldiz, % 63koa da.

Datuek adierazten digute euskararen normalizazio-prozesua inflexio puntuan dagoela, alegia, fase baten amaieran eta beste berri baten atarian gaudela. Fase berri horretan, argia erabileran jarri beharra agerikoa da, beraz.

Eta horretarako, euskararen ulermenari ez diogu behar besteko baliorik eman; izan ere, erabileraren korapiloa askatzeko gako nagusi bat ulermenean dago. Alegia, euskararen ulermena balioan jarriz gero, eta ulermena erabat zabalduz gero, euskararentzat eta gipuzkoarrontzat erabilerarako eremu zabal eta emankorra zabalduko dugu. Izan ere, Gipuzkoako udalerri gehien-gehienetan ulermena %80tik gorakoa da, eta gainerakoetan biztanleen % 60tik gora ulertzen du euskara.

Euskaraldia, 11 egun euskaraz, azaroaren 23tik abenduaren 3ra

Testuinguru horretan, Eusko Jaurlaritzako Hizkuntza Politikarako Sailburuordetzak eta Topaguneak beste hainbat eta hainbat eragilerekin elkarlanean, abian jarri dugu Euskaraldia ekimena, baita gure udalerrian ere, eta ekimen hori garatzeko batzordea osatu.

Ekimen horretan 11 egunetan hizkuntza-praktika berri bat gauzatzera gonbidatuko ditugu herritarrak. Ariketa horren subjektuak 16 urtetik gorako helduak izango gara eta 11 egunez helduen hizkuntza-ohiturak aldatzeko ariketa kolektibo bat egitea da proposamena, ulermena balioan jarrita.

Bi subjektu mota bereizi dira: ahobiziak eta belarriprestak.

Ahobiziak izango dira 11 egun horietan euskarari eutsiko diotenak solaskideak euskaraz ulertzen duen guztietan, eta, belarriprestek, berriz, solaskideak gonbidatuko dituzte berarekin euskaraz aritzera, nahiz eta Belarriprestak euskaraz edo gaztelaniaz erantzun.

Ekimenaren helburua da, besteak beste, ariketa praktiko horren bidez ikusaraztea eta biziaraztea hizkuntza-ohiturak alda ditzakegula, eta, ahal dela, 11 egun horiek pasa ostean, hizkuntza-praktika berri horiei eustea.

Euskaraldia Gipuzkoako Foru Aldundian eta Udaletxeetan

EAEko euskararen erabilera normalizatzeko V. Plangintzaldiak honako datu hauek jasotzen ditu, amaierako ebaluazio-txostenean:

  • Gipuzkoako ordezkari politikoen % 90,4 gai da euskara ulertzeko eta % 86,8 euskaraz hitz egiteko.
  • Gipuzkoako langile publikoen % 86,8k ongi edo oso ongi hitz egiten du euskaraz.

Aipatutako datuak eta Gipuzkoako egoera soziolinguistikoa aintzat hartuta, erabileran eragiteko baldintza egokiak ditugu Gipuzkoan. Euskaraldia, berriz, aukera egokia dugu Gipuzkoako erakunde publikoek, eta, beraz, arduradun politikoek dagokigun erantzukizuna geure gain hartzeko eta eredugarritasunez jokatzeko, erabileran urrats berriak egite aldera.

Horregatik guztiagatik, honako hau aurkezten dugu:

ERAKUNDE ADIERAZPENA

Orioko Udalak honakoa adierazi nahi du:

  • Orioko Udalbatzak bat egiten du Euskaraldiarekin eta ekimenaren sustatzaile izango da. Horrenbestez, erantzukizunez eta eredugarritasunez jokatzeko konpromisoa hartzen du.
  • Ordezkari politikoon egiteko nagusia izango da Euskaraldiaren markoan eta bereziki udal barrura begira ekimena zabaltzea. Horrenbestez, ekimen honetan ahalik eta ahobizi eta belarriprest gehien aktibatzeko urratsak emango ditugu, arduradun politikoak izan nahiz langileak izan.
  • Ahobiziok euskara ulertzen duten guztiekin euskaraz aritzeko konpromisoa hartzen dugu.
  • Belarriprestok, gainerakoak gonbidatuko ditugu gurekin euskaraz egin dezaten, nahiz eta guk euskaraz edo gaztelaniaz erantzun.
  • Orioko Udalak neurriak hartuko ditu hizkuntza-praktika horiek posible izan daitezen eta praktika horiei etorkizunean eutsi ahal izateko.
  • Orioko Udalak, udal barruan ez ezik udalerrian ere, ekimenaren sustatzaile gisa, herritarrak gonbidatuko ditu Euskaraldiko ekimenean parte har dezaten eta izena emateko bideak erraztuko ditu.
  • Orioko Udalak, bat egiten du ekimena Gipuzkoan elkarrekin, elkarlanean eta batera garatzearekin, lurralde mailako politika bateratu bati begira, ahalik eta udal gehienetan, mankomunitateetan, Gipuzkoako Foru Aldundian eta Gipuzkoako Batzar Nagusietan.

 

Udala hasi da dagoeneko lur azpiko edukiontziak egokitzen

Hondakinak biltzeko sistema berriaren ondorioz, lur azpiko edukiontziak egokitu behar ditu Udalak eta dagoeneko ari da lan horretan. Aste honetan bertan egokitu ditu Niko aurrekoak eta Ikastolako DBHko eraikinaren aurrekoak.

Lehengo lur azpiko edukiontziak estuagoak ziren eta espazio berean bost edukiontzi sartzen ziren (organikoa, errefusa, ontziak, paperak eta beira). Oraingoak zabalagoak direnez, lau bakarrik sartzen dira espazio berean eta, beraz, Udalak erabaki du, gertu dauden guneetan, beirarena eta paperaren edukiontziak ez dituela gune guztietan jarriko, baizik-eta batean bai eta ondokoan ez. Esate baterako, ikastolaren aurreko gunean jarri da paperaren edukiontzia, han gehiago erabiliko delakoan; eta Niko ondokoan instalatu da beirarena. Bi guneak nahiko gertu daudenez elkarrengandik, Udalak uste du ez dela eragozpen handirik sortuko erabiltzaileentzat.

Irailetik aurrera segituko du Udalak edukiontziak egokitzeko lanean eta espero du urtea bukatzerako gune guztiak egokituta eta martxan izatea.

Herriko lorazainen omenaldia gure arraunlariei

Estropada-garai bete-betean gaudela, herriko lorategi eta belardiak zaintzen dituzten lorazainek omenaldia egin nahi izan diete gure arraunlariei eta AUPA ORIO handi bat idatzi dute futbol zelaiaren ondoko belardian beren belarra mozteko makinekin.

Bertatik paseatzen ari zarela ez da antzematen; baina dron batekin ateratako argazkian ederki ikusten da gure neska-mutil arraunlarientzako mezua :-)

Gizarte Zerbitzuak eta Berdintasun Politika departamenturako maila ertaineko teknikari lanpostua betetzeko deialdiaren hirugarren ariketa bertan behera utzi du Udalak

Udalak martxan daukan Gizarte Zerbitzuak eta Berdintasun Politika departamenturako maila ertaineko teknikari lanpostuaren deialdiaren barruan iragarkia argitaratu du gaur, deialdi horretako hirugarren ariketa bertan behera utziz eta ariketa berriz egiteko deituz.

Izangaiek, beraz, berriro egin beharko dute hirugarren ariketa hori eta horretarako eguna eta ordua ere erabaki ditu epaimahai kalifikatzaileak: irailaren 24an izango da, astelehenarekin, 10:00etan hasita, Orioko kultur etxean.

Hemen ikusi eta deskargatu daiteke horren berri ematen duen iragarkia:

Gizarte Zerbitzuak eta Berdintasun Politika departamenturako maila ertaineko teknikari lanpostuaren deialdiko hirugarren ariketa bertan behera uzten duen eta deialdi berria egiten duen iragarkia (PDF)

Errefortzu eskolak jasotzen ari dira bi eskoletako zenbait gazte uztailean, euskara-maila indartzeko

Udaleko Euskara batzordeak antolatuta, errefortzu eskolak jarri dira abian aurten ere, ikasle etorriberrien euskara maila hobetzeko.

Astean hiru aldiz hartzen dituzte klaseak: astelehen, asteazken eta ostiraletan, ordu betez. Bi eskoletako haurrak ari dira parte hartzen, bi taldetan banatuta, adinaren eta euskara-mailaren arabera. Uztaila osoa daramate horretan.

Bederatzigarren urtea da Udalak errefortzu-eskola hauek antolatzen dituela udan eta ikastetxeek ondo baloratzen duten zerbitzua da.

Ikastolak utzitako gela batean ari dira klaseak hartzen, Onintza Manterola oriotarra irakasle dutela.

Argazkian ez dira ikasle guzti-guztiak agertzen; baina bai gehienak. 20tik gora gaztetxo dabiltza ikastaroa egiten.

Hondakinen bilketari buruzko zalantzak argitzeko, hezitzailea izango da Orion, asteazkenean

Urola Kostako Udal Elkarteak pertsona bat jarriko du, astean behin Oriora etorriko dena, hondakinen bilketaren inguruko zalantzak argitzeko eta herritarrek dituzten arazoak konponbidean jartzeko.

Pertsona hori datorren asteazkenean, uztailak 25, egongo da udaletxeko bigarren solairuan, 09:00etatik 13:00etara. Gero, abuztuan, ez da pertsona hori etorriko; baina, irailetik aurrera, berriro asteazkenero izango da bertan, abendura arte.

Herritarrek, beraz, bertara jo behar dute zalantzak argitzeko edota arazoren bat dutenean.

Udalbatzarrak ohiko bilkura egingo du asteartean, uztailak 24

Bilkura udalbatzarraren aretoan izango da, udaletxean, eta 19:30ean hasiko da. Ondoko gaiak aztertuko dira:

1.- Irakurri eta onartzea, egoki bada, 2018ko ekainaren 26ko ohiko bilkurako Udalbatzarraren aktaren zirriborroa.

2.- Behin betikoz onartzea, egoki bada, Udalaren 2017ko aurrekontuaren Kontu Nagusia.

3.- Onartzea, egoki bada, Udalaren aurrekontu propioari dagokion 4/2018 zenbakidun kreditua aldatzeko espedientea; kreditu aldaketa kreditua transferitzeko modalitatean egina dago.

4.- Onartzea, egoki bada, Udalaren aurrekontu propioari dagokion 5/2018 zenbakidun kreditua aldatzeko espedientea; kreditu aldaketa kreditu gehigarrien modalitatean egina dago.

5.- Eskariak eta galderak.

Larunbateko zine-emanaldia gaztetxean izango da, eguraldiagatik

Larunbatean 'Handia' filmaren proiekzioa programatu du Udalak eta, hasiera batean, ikastola aurreko plazan izatekoa bazen ere, eguraldiaren aurreikuspena txarra da eta Udalak erabaki du proiekzioa gaztetxean egitea.

Ordua ez da aldatuko eta, beraz, filmaren proiekzioa 22:15ean hasiko da.

Sarrera doan izango da.

Dagoeneko libre da hondartzan bainatzea

Osakidetzak egindako azken neurketan hondartzako uraren kalitateak 'bikaina' kalifikazioa jaso du.

Horren ondorioz, kendu egin da asteartean indarrean jarri zen hondartzan bainatzeko debekua eta, bestelako abisurik ez bada, lasai bainatu daitezke herritarrak eta bisitariak Orioko hondartzan.