elhuyar itzaultzaile automatikoaren logoa Itzulpen
automatikoa:
ES FR EN CA GL

Ireki da izen-ematea Hazilan programaren 11. edizioan parte hartzeko

Eskualdeko 15 partaidek osatuko dute taldea, gehienez, eta guztiek enpresetan praktikak egiteko aukera izango dute

Urola Kostako Udal Elkarteak HAZILAN egitasmoaren hamaikagarren deialdia egin du, datorren urteari begira. Egitasmoa goi mailako ikasketak dituzten eskualdeko 20-44 urte arteko langabeei edota lana hobetu nahi dutenei bideratuta dago:

  • Langabeen kasuan, laneratzen laguntzeko
  • Lanean ari direnen kasuan, beren lan aukerak hobetzeko.

Udalak Gabonetako argi eta apaingarri berriak instalatuko ditu aurten

Udalak aldatu egin du Gabonetako argiak direla eta azken urteotan erabili duen irizpidea eta herriaren izaerarekin lotuago dauden argi eta apaingarriak instalatuko ditu aurten. Dagoeneko hasita dago argietako batzuk instalatzen: argazkian ikusi daiteke, esate baterako, herriko zubiaren azpian jarri diren koloretako argiak, errioa argiztatzen dutenak. Datozen egunotan, pixkanaka, instalazioa osatzen joango da Udala, plazan, moila inguruan, Eusko Gudari kalean…

Eskualdeko ostalariei prestakuntza emango die Udal Elkarteak

Egoera zaila bizi du ostalaritzak eta, horren aurrean, Urola Kostako Udal Elkarteak, bere eskumen eta ahalmenen baitan, babesa eman nahi dio sektoreari eta, horretarako, hainbat ekimen jarriko ditu martxan.

Astelehenetik aurrera, txartelarekin irekiko dira berriz organikoaren eta errefusaren edukiontziak

Urriaz geroztik, hondakinak biltzeko sistema berrantolatzen ari da Urola Kostako Udal Elkartea: kaleko edukiontzien erabilera eta saltoki eta enpresetako hondakinen bilketa aztertu du eta optimizatzeko neurriak hartuko ditu herriz herri.

Igogailu berria jarri du Udalak KTA eraikinean, irisgarritasuna hobetzeko

Bikamiotan dagoen KTA eraikineko igogailu zaharra matxuratuta zegoen aspaldi eta, gainera, ez zituen betetzen gaur egungo irisgarritasun-arauak. Hori dela eta, aldatu eta berria jartzea erabaki zuen Udalak eta lanak lizitaziora atera zituen uda aurretik.

Ahitu dira dagoeneko merkataritza suspertzeko erosketa-bonuak

Herriko merkataritza suspertzeko kanpainari harrera ona egin diote herritarrek eta dagoeneko ahituta daude erosketa-bonuak. 1.000 erosketa-txartel atera ditu udalak, eta denak saldu dira turismo-bulegoan.

Udalak azaroaren 2an jarri zuen kanpaina martxan, herriko merkataritza suspertzeko helburuarekin. Herritar bakoitzak 60 euroko balioko bonu bana erosteko aukera izan du, 40 euroan.

Udalbatzarrak ohiko bilkura egingo du ostegunean, azaroak 26

Bilkura udalbatzarraren aretoan egingo da, udaletxean, distantzia- eta segurtasun-neurriak zainduta. 19:30ean hasiko da, eta gai hauek aztertuko dira:

1.- Irakurri eta onartzea, egoki bada, udalbatzarraren 2020ko irailaren 24ko eta urriaren 29ko ohiko bilkuretako akten zirriborroak.

2.- Onartzea, egoki bada, Orioko Udalaren 2021eko aurrekontu orokorra eta aurrekontuaren exekuzioari buruzko udal-araua.

3.- Onartzea, egoki bada, Udalaren 2021 urterako plantilla organikoa eta lanpostuen zerrenda.

4.- Onartzea, egoki bada, EH BILDU udal talde politikoak aurkeztutako mozioa, Udal finantzaketarako Foru Funtsari eta Zorpetzeari buruzkoa.

5.- Eskariak eta galderak.

Dagoeneko ahitu dira txartelak Julen Alonso & Oinkari dantza-taldearen ikuskizunerako eta San Nikolas eguneko bertso-saiorako

Orioko Udalak antolatutako Julen Alonso & Oinkari dantza-taldearen ikuskizunerako sarrerak ahitu egin dira dagoeneko.

Horrez gain, Errikotxia elkarteak eta Udalak antolatutako San Nikolas eguneko bertso-saiorako gonbitak ere ahituta daude atzoz gero.

Udalak Saharako bandera jarri du udaletxeko balkoian, herri sahararrari elkartasuna erakusteko

2020ko azaroaren 13an Marokok bere armada bidali zuen Guergueratera, eremu hartan manifestazioak egiten ari ziren sahararrak erreprimitzeko. Sortutako egoeraren aurrean, Saharako Errepublika Arabiar Demokratikoko presidenteak, adierazpen baten bitartez, amaitutzat eman du Fronte Polisarioak eta Marokoko Erresumak 1991n sinatutako su-eten konpromisoa.

Egoera larria da eta, horren aurrean, Orioko Udalak elkartasuna erakutsi nahi izan dio herri sahararrari eta, horretarako, Saharako bandera zintzilikatu du udaletxeko balkoian.

OLATURA-UP! ekimenaren 2. edizioa jarri du martxan Udal Elkarteak

Aurreko edizioaren arrakasta ikusita, abian da OLATURA-UP! egitasmoaren 2. edizioa. Eskualdeko ekintzaile eta enpresari txikien negozioak ezagutarazi, eta bertako kontsumoa sustatzeko programa da. Abenduan garatuko da ekimena; bereziki, merkatari, ostalari eta negozio txikiei bideratuta.

Ekimenaren helburua da eskualdeko ekintzaile eta negozio txikien jarduna ikusaraztea. COVID-19ak sortutako testuinguru berri honetan, ezinbestekoa da ekintzaile nahiz enpresari txikiek jauzi digitala egitea. Horretarako, «Google My Business» fitxa erreminta oso aproposa da; bai ohiko bezeroarengana hurbiltzeko; baita bezero berriek erraz aurkitzeko ere. Azken finean, eskualdeko negozioen ikusgaitasunaren bitartez, eskualdeko kontsumoa bultzatu nahi du Udal Elkarteak ekimen honen bidez.

Elkarretaratze birtuala egingo dute eskualdeko ikastetxeek, Emakumeen Aurkako Indarkeria Desagerrarazteko Nazioarteko Eguna dela-eta

Gaur eguerdian aurkeztu dute ekitaldia Udalak, Zaragueta eskolak, Herri Ikastolak eta Berritzeguneak. Zingira eskolak eta Ahalduntze Eskolak ere bat egin dute ekimenarekin, baina ezin izan dute gaurko prentsaurrekoan parte hartu. Anuska Esnal alkateak eta Nekane Azurmendi Berritzegunekoak irakurri dute prentsa-oharra guztion izenean.

Ekitaldi birtuala izango da aurtengoa

Orioko Zaragueta eskolako, Herri Ikastolako eta Zingira eskolako haur, gaztetxo eta irakasleek, eskualdeko gainontzeko ikastetxeekin batera, elkarretaratze birtuala egingo dute online azaroaren 25eko eguerdian, Emakumeen Aurkako Indarkeria Desagerrarazteko Nazioarteko Eguna dela eta.

Bukatu dira futbol-zelaiko belar artifiziala berritzeko lanak

Dagoeneko guztiz bukatuta daude Udalak Mendibeltz futbol eta softbol zelaian belar artifizial berria jartzeko egin dituen lanak. Fielturf-Poligras enpresak egin ditu, Udalak deitutako lehiaketa publikoa irabazi eta gero. Irailaren 8an hasi ziren lanak eta urriraren 30ean bukatu ziren. Azaroan azken xehetasunak bukatzen aritu dira eta FIFA homologazioa lortzeko probak egin dira.

Obren aurrekontua, adjudikatu zenean, 300.106,52 eurokoa zen. Gero, zenbait lan gehigarri ere egin dira eta, azkenean, 323.286,70 eurotan likidatu da obra. Beraz, egindako lan gehigarri horiekin, % 7,7 handitu da kostua.