Aurtengo udan ere Kirol Anitzak jarduera izango da kiroldegian, LH1etik LH6ra bitarteko haurrentzat

Haurrentzako aurtengo udako kirol eskaintza ez du oraindik publiko egin Udalak. Normaltasun berrirako ezartzen diren arauek markatuko dute zer egin ahal izango den eta, beraz, behin horiek zehaztuta erabakiko du Udalak nolako eskaintza egin.

Nolanahi ere, guraso asko ari dira galdezka eta dagoeneko esan daiteke Kirol Anitzak jarduera egiteko aukera izango dela uztailean eta abuztuan, LH1etik LH6ra bitarteko haurrentzat.

Erosketa-bonuak erosi eta erabiltzeko deia egin du Udalak

Herriko dendak suspertzeko erosketa-bonuak kultur etxean daude salgai. 40 euroren truke 60 euroko erosketa egin ahal izango dute herritarrek COVID-19ak kaltetutako establezimenduetan. Pertsona bakoitzak bonu bakar bat erosi ahal izango du: 40 eurotan erosiko du eta, gero, bonu horrekin, 60 euroko gastua egin ahal izango du ekimenean parte hartzen duten dendetan (ez du zertan dena denda bakar batean gastatu behar; aukera izango du 15 euroko lau erosketa egiteko). Udalak 20 euro jarriko ditu saltzen den bonu bakoitzeko, horretarako sortu duen partida berezitik ordainduko direnak.

Herritarren erantzun ona

Udaleko Merkataritza batzordeak jarri du martxan ekimena eta erantzun ona izaten ari da. Parte hartzen ari diren establezimendu batzuetan dagoeneko iritsi dira bonuen bidez saldu dezaketen topera (establezimendu bakoitzak, gehienez, 60 euroko 20 bonu hartu ditzake).

Danbolin Musika Eskolak online egingo ditu aurten ikasturte bukaerako entzunaldiak

Ikasturte hau berezia izan da Danbolin Musika Eskolako ikasle eta irakasleentzat. Gainerako guztiek bezala, egun batetik bestera ezohiko egoera batean aurkitu zuten beren burua eta ahalegin izugarria egin behar izan zuten nork bere etxetik lanean segitzeko.

Ahalegin horren fruitu da, besteak beste, ikasturte bukaerarako prestatu duten bideoa:

Astelehenean irekiko da kiroldegia, prebentzio- eta segurtasun-neurriak beteta

Datorren astelehenean, ekainak 15, irekiko ditu ateak Orioko kiroldegiak. Udalak eta kiroldegia kudeatzen duen enpresak, BPXport-ek, aste honetan adostu dituzte irekitzeko baldintzak, herritarrek lasai erabiltzeko instalazioak.

Fitnesseko makinak erabiltzeko ez da hitzordurik hartu beharko baina igerilekurako eta padel eta tenis pistak erabiltzeko, bai.

Gaurko egunez egin da Orioko hauteskunde-mahaiak osatzeko zozketa

Gaur, ekainak 11, egin da zozketa publikoa udaletxean, uztailaren 12ko Eusko Legebiltzarrerako hauteskundeetako mahaiak osatuko dituzten herritarrak aukeratzeko.

Irudiko zerrendan ikusi dezakezue titular ala ordezko gisa tokatu zaizuen ala ez. Nolanahi ere, Udalak formalki jakinaraziko die zozketan aukeratuak gertatu direnei.

Jendaurrean dago autokarabana-guneen erabilera arautzen duen udal-ordenantza

Udalak prestatu dituen bi autokarabana-guneen erabilera udal-ordenantza baten bidez arautuko da.

Udalak 2020ko apirilaren 30eko udalbatzarrean eman zion lehen onarpena ordenantza horri eta, beraz, jendaurrean dago orain, uztailaren 13a arte. Hemen ikusi eta deskargatu daiteke ordenantzaren testua:

Txanka-Hondartzako bidea erabili beharko da ekainaren 10ean, herrira autoz sartzeko

Plaza inguruan egiten ari diren lanak direla eta, herriko ohiko sarrera, Txistulari kalekoa, itxita egongo da ekainaren 10ean, asteazkenarekin.

Goizeko 08:00etan itxiko da Txistulari kaleko sarrera eta itxita egongo da egingo dituzten lanak bukatu arte. Udalak aurreikusten du goiz osoa izango dela sarrera hori itxita eta arratsaldez ireki ahal izango dela. Nolanahi ere, ez da segurua arratsaldez irekitzea, lanen martxak erakutsiko duelako hori posible den.

Urola Kostako Udal Elkartea ohiko zerbitzuak ari da ezartzen berriro, pixkanaka

Deskonfinamenduaren faseek aurrera egin ahala, ohiko zerbitzuak berrezartzen ari da Urola Kostako Udal Elkartea, betiere segurtasun- eta higiene-neurriak beteta.

Gaurtik aurrera, esaterako, Garapen Agentziak eta Ingurumen alorreko hainbat zerbitzuk ohiko jarduerari helduko diote: Open Lab guneak eta Garbigune Zerbitzuak.

Ekainaren 15ean irekiko da Karela kiroldegia

Deskonfinamenduaren hirugarren fasean kirol-instalazioak irekitzeko aukera dago, gehienez %60ko aforoarekin, eta taldeko entrenamenduak ere egin ahal izango dituzte, besteak beste, arraunlariek.

Karela kiroldegia ekainaren 15ean irekiko da, datorren astelehenean, eta aste honetan lotuko ditu Udalak zehaztasunak BPXport enpresarekin.

Udal-pilotalekuak itxita jarraituko du oraingoz.

Haurreskola

Eusko Jaurlaritzak 0-3 urtekoentzako haur eskolak irekitzea baimendu du gaurtik aurrera, gehienez aforoaren %60arekin.

Haurreskolek erabakia zuten irailera arte ez irekitzea, baina gaia berriz aztertuko dute orain. Maria Maestra haurreskolak gurasoekin hitz egingo du egun hauetan eta, aldaketarik bada, jakinaraziko du.

Udaletxea eta kultur etxea jendearentzat irekiko dira berriz, astelehenetik aurrera

Deskonfinamenduaren hirugarren fasean sartuko gara ekainaren 8an eta, horrekin batera, Orioko udaletxea eta kultur etxea irekiko dira berriro.

Azken asteotan hitzordua hartu behar zen, udaletxera joateko, baina, astelehenetik aurrera, berriz irekita izango ditu ateak betiko ordutegian: 08:30etik 14:30era.

Maskara nahitaezkoa

Bai udaletxean eta bai kultur etxean nahitaez garbitu beharko dira eskuak gel hidroalkoholikoarekin sartzerakoan eta irteterakoan, eta maskara ere nahitaez erabili beharko da eremu komunetan eta bi metroko distantzia zaindu ezin denean. Bi eraikin publiko horietan eskailerak estuak dira eta ez dute aukerarik ematen bi metroko distantzia zaintzeko. Horregatik da beharrezko maskara janztea. Udaletxean, gainera, banaka jo behar dute herritarrek harrera-lekura eta, jendea pasilloetan ez pilatzeko, txanda itxoiteko tokiak markatu ditu Udalak, eskaileretan eta udaletxeko sarreran.

Ekainaren 15a da azken eguna, «Udan elkar zaintzen» programan izena emateko

Udalak eta Txurrumuski aisialdi-elkarteak martxan jarri duten «Udan elkar zaintzen» programan izena emateko epea ekainaren 15ean itxiko da. Izena eman nahi dutenek galdetegi hau osatu behar dute:

Izen-emateko galdetegia

Galdetegia bete ondoren, Txurrumuski jarriko da harremanetan izena eman dutenekin, onartuak izan diren ala ez esateko eta zehaztasunak emateko.

Urola Kostako Udal Elkarteak online ikastaroak emango ditu, lana bilatzeko eta telelana errazteko

Ekainaren 8tik aurrera, hamalau prestakuntza-modulu labur emango ditu, irekiak langabezian daudenentzat edo lanean dabiltzanentzat.

Ikastaroetan gai hauek landuko dira, besteak beste: lan-bilaketa online, telelanerako beharrezko gaitasunak, etxetik lana bilatzeko edo lan egiteko online dauden euskarri eta plataformak, krisi-egoerei aurre egiteko abileziak…