Dagoeneko ahitu dira txartelak Julen Alonso & Oinkari dantza-taldearen ikuskizunerako eta San Nikolas eguneko bertso-saiorako

Orioko Udalak antolatutako Julen Alonso & Oinkari dantza-taldearen ikuskizunerako sarrerak ahitu egin dira dagoeneko.

Horrez gain, Errikotxia elkarteak eta Udalak antolatutako San Nikolas eguneko bertso-saiorako gonbitak ere ahituta daude atzoz gero.

Udalak Saharako bandera jarri du udaletxeko balkoian, herri sahararrari elkartasuna erakusteko

2020ko azaroaren 13an Marokok bere armada bidali zuen Guergueratera, eremu hartan manifestazioak egiten ari ziren sahararrak erreprimitzeko. Sortutako egoeraren aurrean, Saharako Errepublika Arabiar Demokratikoko presidenteak, adierazpen baten bitartez, amaitutzat eman du Fronte Polisarioak eta Marokoko Erresumak 1991n sinatutako su-eten konpromisoa.

Egoera larria da eta, horren aurrean, Orioko Udalak elkartasuna erakutsi nahi izan dio herri sahararrari eta, horretarako, Saharako bandera zintzilikatu du udaletxeko balkoian.

OLATURA-UP! ekimenaren 2. edizioa jarri du martxan Udal Elkarteak

Aurreko edizioaren arrakasta ikusita, abian da OLATURA-UP! egitasmoaren 2. edizioa. Eskualdeko ekintzaile eta enpresari txikien negozioak ezagutarazi, eta bertako kontsumoa sustatzeko programa da. Abenduan garatuko da ekimena; bereziki, merkatari, ostalari eta negozio txikiei bideratuta.

Ekimenaren helburua da eskualdeko ekintzaile eta negozio txikien jarduna ikusaraztea. COVID-19ak sortutako testuinguru berri honetan, ezinbestekoa da ekintzaile nahiz enpresari txikiek jauzi digitala egitea. Horretarako, «Google My Business» fitxa erreminta oso aproposa da; bai ohiko bezeroarengana hurbiltzeko; baita bezero berriek erraz aurkitzeko ere. Azken finean, eskualdeko negozioen ikusgaitasunaren bitartez, eskualdeko kontsumoa bultzatu nahi du Udal Elkarteak ekimen honen bidez.

Elkarretaratze birtuala egingo dute eskualdeko ikastetxeek, Emakumeen Aurkako Indarkeria Desagerrarazteko Nazioarteko Eguna dela-eta

Gaur eguerdian aurkeztu dute ekitaldia Udalak, Zaragueta eskolak, Herri Ikastolak eta Berritzeguneak. Zingira eskolak eta Ahalduntze Eskolak ere bat egin dute ekimenarekin, baina ezin izan dute gaurko prentsaurrekoan parte hartu. Anuska Esnal alkateak eta Nekane Azurmendi Berritzegunekoak irakurri dute prentsa-oharra guztion izenean.

Ekitaldi birtuala izango da aurtengoa

Orioko Zaragueta eskolako, Herri Ikastolako eta Zingira eskolako haur, gaztetxo eta irakasleek, eskualdeko gainontzeko ikastetxeekin batera, elkarretaratze birtuala egingo dute online azaroaren 25eko eguerdian, Emakumeen Aurkako Indarkeria Desagerrarazteko Nazioarteko Eguna dela eta.

Bukatu dira futbol-zelaiko belar artifiziala berritzeko lanak

Dagoeneko guztiz bukatuta daude Udalak Mendibeltz futbol eta softbol zelaian belar artifizial berria jartzeko egin dituen lanak. Fielturf-Poligras enpresak egin ditu, Udalak deitutako lehiaketa publikoa irabazi eta gero. Irailaren 8an hasi ziren lanak eta urriraren 30ean bukatu ziren. Azaroan azken xehetasunak bukatzen aritu dira eta FIFA homologazioa lortzeko probak egin dira.

Obren aurrekontua, adjudikatu zenean, 300.106,52 eurokoa zen. Gero, zenbait lan gehigarri ere egin dira eta, azkenean, 323.286,70 eurotan likidatu da obra. Beraz, egindako lan gehigarri horiekin, % 7,7 handitu da kostua.

Abenduko kultur agenda aurkeztu du Udalak

Udalak prentsaurrekoa eman du goizean, abenduko kultur jardueren agenda aurkezteko. Prentsaurrekoa 11:30ean egin da eta bertan izan dira Xabier Ibarguren kultur zinegotzia, Julen Alonso musikari oriotarra eta Uhaina Atxotegi kultur teknikaria.

Prentsaurrekoan, Xabier Ibargurenek nabarmendu nahi izan du «Udal-gobernuak, kulturaren alde egoteaz gain, kulturaren alde egiteko pausoa ere eman nahi» duela, eta horretara datorrela abenduko kultur jardueren agenda. «Hizkuntzak eta kulturak egiten gaituzte herri eta, egoera zail honetan, mahai gainean jarri nahi dugu kultura segurua dela eta beharrezkoa dela. Ahal dugun neurrian, horretan ere arnasgune izan nahi dugu, kulturak aberastasuna eta osasuna ere ematen baitu, arlo guztietan. Eta hori da herriari eskaini nahi dioguna».

Euskaraldiko txapak kultur etxean banatuko dira azaroaren 16tik 20ra

Datorren ostiralean, azaroak 20, hasiko da aurtengo Euskaraldia, eta izena eman dutenek aste honetan jaso ahal izango dituzte Ahobizi eta Belarriprest txapak, kultur etxean.

Goizean, kultur etxeko atezainak banatuko ditu txapak eta arratsaldean, berriz, Orioko Euskaraldiko lantaldeko kideak arduratuko dira. Banaketa kultur etxeko areto nagusian egingo da, segurtasun-arauak beteta eta distantziak zainduta. Jende-pilaketarik ez gertatzeko, areto nagusiko bi ateak erabiliko dira: bat sartzeko eta bestea ateratzeko.

Zarauzko Garbigune berriaren obraren finantzaketa onartu du Urola Kostako Udal Elkarteak, aho batez

Garbigune berria izango du Urola Kostak 2022ko lehen seihilabetean. Pasa den astelehenean (azaroak 9) egindako Zuzendaritza Batzordean onartu da Zarautzen eraikiko den Garbigunearen obraren finantzaketa; aho batez, EAJren eta EH Bilduren aldeko botoekin.

Erosi 40 euroko bonua eta egin 60 euroko erosketa Orioko dendetan!

Orioko Udalak martxan du merkataritza suspertzeko kanpainaren bigarren txanda, eta dagoeneko erosketa-bonu asko saldu ditu, turismo-bulegoan (Pilliku plazan, Goiko kalean). Oraindik geratzen dira bonuak erosteko.

Herritar bakoitzak erosketa-bonu bat erosi dezake, 40 euroan eta, ondoren, 60 euroko gastua egin ahal izango du ekimenera atxikitutako herriko establezimenduetan (ikusi zerrenda behean). Udalak jartzen du 20 euroko diferentzia bonu bakoitzean, herriko dendak laguntzeko. Ez dago zertan bonu osoa denda bakar batean gastatu: aukera dago 15 euroko lau erosketa egiteko, toki berean ala lau toki desberdinetan.

Orioko Udalak dirulaguntzak emango dizkie herriko dendari eta tabernariei, COVID-19ari aurre egiteko inbertsio eta ekipamenduetarako

Orioko Udalak merkataritza eta ostalaritza sektoreei zuzendutako dirulaguntzen deialdia egin du, Foru Aldundiko Ekonomia Sustapeneko, Turismoko eta Landa Inguruneko Departamenduaren finantzaketarekin.

Dirulaguntzen helburua pandemiari aurre egiteko inbertsioak finantzatzen laguntzea da, eta Udalaren deialdiak 24.741 euroko aurrekontua du.

Bertan behera geratu da Miriam Mendoza ipuin-kontalariaren gaur arratsaldeko saioa

Miriam Mendozak ipuin-kontaketa saio bat eman behar zuen gaur astelehena, azaroak 9, Orioko kultur etxean, baina bertan behera geratu da saioa, kontalaria konfinatuta dagoelako.

Udala saiatuko da emanaldia ahalik eta azkarren berriro antolatzen.

Barkatu eragozpenak.

Ostiralean bukatuko da epea, «Euskaraz Gazte» literatur lehiaketara lanak aurkezteko

Udalak 16 urtetik gorako herritarrentzat antolatzen duen «Euskaraz Gazte» literatur lehiaketan lanak aurkezteko epea 2020ko azaroaren 13an bukatuko da, ostiralarekin.

Lanak Orioko Euskara Zerbitzuan edo Aiako kultur etxean aurkeztu daitezke.

1.700 euro daude saritan, lanik onenen artean banatzeko.