Arrakastatsua izan da 'Aniztasunaren kudeaketa Urola Kostan' programa

Eskualdeko 4 enpresak hartu dute parte, estreinakoz, esperientzia pilotuan eta 2019an jarraipena emango zaio ekimenari.

Azken urteotan testuinguru ekonomiko eta sozialean izan diren aldaketen eraginez, inoiz baino aniztasun handiagoa dago enpresetan. Jatorri, ezagutza eta motibazio desberdinetako pertsonak biltzen dira gaur egungo enpresetan; ondorioz, kudeaketa-mekanismo tradizionalak jadanik ez dira eraginkorrak. Eta, aldi berean, desberdintasun horiek aukera berriak sortzen dizkiete erakundeei eraginkorragoak eta berritzaileagoak izateko.

“Aniztasunaren Kudeaketa Urola Kostan” egitasmoaren bidez, erronka horiei aurre egiten, aniztasunaren onura potentzialak aprobetxatzen eta izan ditzakeen ondorio negatiboak minimizatzen lagundu zaie Urola Kostako eskualdeko enpresei. 

Lehen edizio emankorra

Gero eta ohikoagoa da enpresetan askotariko bizimodu, joera eta ezaugarriak dituzten langileen arteko interakzioa. Jada horren homogeneoak ez diren lantaldeak kudeatzea, gaur gaurkoz, enpresa guztien zuzendaritzaren eginkizunetako bat da.

Enpresaren izaera, tamaina eta jarduna edozein dela ere, aniztasuna egoki kudeatzeak ugaritasuna hobeto baloratu eta diskriminazioak eragindako kostuak murriztea dakar. Aniztasunak, egoki kudeatuz gero, ateak zabaltzen dizkio enpresaren jardunari; batez ere, merkatu globaletan negozio aukera berriak sor ditzakeelako.

Testuinguru horretan, arrakastatsua izan da programaren lehen edizioa. Eskualdeko 4 enpresak hartu dute parte, estreinakoz, esperientzia pilotuan. Epe motzera etor litezkeen aldaketak aurreikusi eta errealitate berrira egokituz, enpresan kudeaketa eraginkor baterako lehen oinarriak landu dituzte egitasmoaren bitartez.

Tresna berriak

“Aniztasunaren Kudeaketa Urola Kostan” ekimenaren lehen edizioak hainbat erreminta sortu ditu:

Gida orokorra: aniztasuna kudeatu eta ekintza plana erakundearen baitan aplikatzeko enpresentzat lagungarri da gida. Hain zuzen, enpresei aniztasuna ondo kudeatzeko tresnak ematea da gida honen helburua, aniztasunak enpresetako lan-taldeei sortzen dizkien erronkei aurre egiten laguntzeko. Zehazki, hauek dira gida honen helburuak:

  • Enpresak sentsibilizatzea aniztasunak erakundeetan sor ditzakeen aukeren inguruan.
  • Enpresak sentsibilizatzea aniztasuna ondo kudeatzearen garrantziari buruz.
  • Aniztasunari buruzko jardunbide egokien eta sor ditzakeen aukeren adibide zehatzak ematea.

Autodiagnostikorako tresna: aniztasunari dagokionez, lantaldeen barne-egoera baloratzeko erreminta da. Tresna honen bidez, lantaldeen barne-egoera baloratzen da. Autodiagnostikoa egiteko tresna hiru dokumentuz osatuta dago: bi dira enpresak bete beharrekoak eta hirugarrena, langileek bete beharreko galdetegi anonimo bat da.

Plan ereduak: Ekintza plana definitu eta ezartzeko jarraibide gisa. Ekintza plan eredu bat lantzearekin batera, enpresa bakoitzaren errealitatera egokitutako ekintza-plana definitu eta horren ezarpena egin da.

Enpresa parte-hartzaileak

GUREAK desgaitasunen bat duten pertsonentzako –lehentasunez, adimen- desgaitasunen bat duten gipuzkoarrentzako– lan-aukera egonkorrak eta egokituak sortzen eta kudeatzen dituen euskal enpresa-taldea da. 

Ondozabal Group ingeniaritza eta industria-mekanikaren arloko enpresa-talde bat da. Talleres Ondozabal, SA talde horretako enpresetako bat da. Aia-Orion (Gipuzkoa) dago kokatuta, eta serie labur-ertainak mekanizatzen ditu.

ZUE SL 1987an sortutako galdaragintza-enpresa bat da, sektorean 31 urteko esperientzia duena. Galdaragintza ertain eta astunaren arloan jarduten du Zumaian (Gipuzkoa) duen instalazioan. Lan hori egiteko, puntako teknologia eta goi-prestakuntzako lan-taldea ditu.

Zumaiena Zumaian kokatutako ikastetxe kontzertatu bat da. Langileek eta familiek bultzaturiko hezkuntza-proiektua du, Zumaian errotua, beste hainbat profesional eta erakunderekin elkarlanean. Kalitatezko hezkuntza eskaintzen du, euskalduna, euskal kulturan oinarritua, aniztasuna zaintzen duena, integratzailea eta ez-diskriminatzailea, beste kulturetara eta familia-mota guztietara irekia eta ingurumenaren ikuspegitik iraunkorra, 0 eta 18 urte arteko ikasleentzat.

Aurrera begira

Eskualdearen garapenerako faktore erabakigarrienetako bat dela ulertuta, eta lehen edizioak emandako emaitza onak eskuan, Udal Elkarteak jarraipena eman nahi dioi ”Aniztasunaren Kudeaketa Urola Kostan” ekimenari.

2019ra begira, asmoa da, jarduera eta tamaina edozein dela ere, Aia, Getaria, Orio, Zarautz eta Zumaiako ahalik eta enpresa gehienetara zabaltzea ekimena.

Izen-ematea eta informazioa

Izena eman edota informazio gehiago jasotzeko, idatzi e-mail bat edo jarri harremanetan telefono bidez:

 

Gabonetako kultur jardueren agenda publikatu du Udalak

Honako hau da aurtengo Gabonetako kultur jardueren agenda:

ABENDUAK 14, OSTIRALA

17:00 -19:00 Jostailuak jasoko dira Herriko Plazan, Herriok antolatutako jostailu erabilien truke-azokaren barruan.

ABENDUAK 15, LARUNBATA

10:30 -14:00 Jostailu erabilien truke-azoka Herriko Plazan, Herrio natur taldeak antolatuta. Eguraldi txarra egiten badu, frontoian izango da.

ABENDUAK 16, IGANDEA

16:30 Mandala tailerra umeekin kultur etxean. Ondoren, herriko zuhaitza apainduko dute egindako mandalekin.

ABENDUAK 19, ASTEAZKENA

19:30 Gabonetako kontzertua elizan: Salatxo abesbatza eta Danbolin musika eskola.

ABENDUAK 22, LARUNBATA

22:00 Herribil ekitaldia Karela kiroldegian, Harribil dantza taldeak antolatuta.

ABENDUAK 24, ASTELEHENA

10:45 Haurren kalez kaleko kantu-saioa. Eskola, ikastola eta Danbolin Musika Eskolako haur, irakasle eta gurasoak kantari arituko dira kalez kale, Ikastola ondoko plazan hasita.

11:00 Tonbola plazan, Ikastolako DBHko ikasleek antolatuta.

17:30 Olentzeroren eta Mari Domingiren etorrera Herriko Plazara, Lera taldearen eskutik.

ABENDUAK 28, OSTIRALA

11:00 - 13:30 eta 16:30 - 19:30 Gabonetako haur-parkea, Karelan.

19:30 Gospel-kontzertua San Nikolas elizan: The Upper Room.

ABENDUAK 31, ASTELEHENA

11:30 San Silvestre lasterketa, ikastola aurretik abiatuta. Haurrak

12:00 San Silvestre lasterketa, ikastola aurretik abiatuta. Helduak. Izen-ematea Karelan.

URTARRILAK 5, LARUNBATA

11:00 Erregeen karterua. Bizarzuri kalez kale ibiliko da, gutunak jasotzen. Eguerdian plazara iritsiko da.

17:00 Erregeen kabalgata herrian barrena. Karela kiroldegian bukatuko da.

Balea-hezurrak irudikatzen dituen konposizio batekin apainduko du Udalak zubiaz bestaldeko errotonda

Errotondak, era horretara, omenaldia egingo dio Orioko herriaren historiari, ikusgarri eginez balea-arrantzak gurean izan duen garrantzia.

Aurreko astean hasi ziren errotondako konposizioa egiten eta aste honetan bukatuko dituzte lanak. Aurrena errotondako lurra mugitu dute eta, beheko planoan ikusten den bezala, menditxo batzuen forma eman diote. Menditxo horien aurrean  kokatuko da balearen hezurdura, Zarauztik autoan etorrita aurrez aurre ikusiko dena. Hezurdura zurez egina dago eta bost metrotik gorako altuera izango du punturik garaienean.

Balea-arrantza gogoan

XVI. mendean, urtero-urtero, udaberriarekin batera, Orioko eta inguruko portuetako 20-30 ontzi inguru abiatzen ziren balea-arrantzara gaur egun Kanadako lurra den Red Bay ingurura. Balea-arrantza jarduera garrantzitsua zen garai haietan eta, gaur egun ere, bizirik jarraitzen du oriotarron memorian; batez ere, 1901ean bertako arrantzaleek harrapatu zutelako gure kostaldean arrantzatu den azken balea. Baleak Orion izan duen eta oraindik daukan balio sinboliko horri erantzun nahi dio errotondan instalatzen ari diren konposizioak.

Konposizioaren osagaiak

Bi elementu hauek osatuko dute konposizioa:

  • Batetik, teila hautsien gaineko balea-hezurdura. Teilak Red Bay-ra urtero bidaiatzen zuten XVI. mendeko arrantzale haiek gogora ekartzeko jarriko dira. Balea-hezurdurak, berriz, 1901eko balea eta galtzeko arriskuan dagoen sardako balea irudikatuko du.
  • Bestetik, hezurren atzean, bost muino izango dira, Balearen bertsoek deskribatzen dituzten bost traineruak eta haiek gidatzen zituzten ‘mutil bizkor bikainak’ omentzeko.

Errotonda apaintzeko proposamena Enviser enpresarena da. Enviser arduratzen da, gaur egun, Orioko lorazaintza-zerbitzuaz eta, lehiaketara aurkezterakoan, hobekuntza gisa planteatu zuen errotonda apaintzea. Beraz, Enviserrek ordainduko ditu lan horren gastuak. Konposizioaren diseinua Ari arkitektura enpresa zarauztarrak egin du eta, diotenez, oriotarren kemenaren eta indarraren oroigarri izango da.

errotondakobaleaBI18

2018ko San Nikolas Festak-Trafiko Aldaketak

Udaltzaingoaren oharra

San Nikolas festetan Herriko plaza itxi egingo da ibilgailuentzat, urtero bezala, abenduaren 5eko 14:00etatik abenduaren 9ko 20:00ak arte.

Trafiko aldaketak hauek izango dira:

- Kaian zirkulazioaren norabidea aldatu egingo dugu.

- Ibilgailuak kaiatik barrena sartuko dira herrira eta DEBEKATUA izango dute bide hori erabiltzea herritik ateratzeko.

- Herritik ateratzeko, NAHITANAHIEZ, Txanka-hondartzako bidea erabili behar da.

Herritarrei eskatzen diegu kolaboratzea eta arau hauek betetzea.

Eskerrik asko aldez aurretik.

Udalak publiko egin ditu turismo teknikariaren eta udal kanpineko zuzendariaren deialdietako onartu eta baztertuen zerrendak, epaimahaien osaketak eta lehen ariketen deialdiak

Udalak bi lanpostu betetzeko deialdiak dauzka abiatuta:

  • Turismo, merkataritza eta ostalaritza departamenturako maila ertaineko teknikaria
  • Udal-kanpineko zuzendaria

Deialdi horiek direla-eta, bi iragarki publikatu ditu gaur Udalak:

Lehen ariketa urtarrilaren 16an

Bi iragarki horietan zehazten da:

  • Deialdi bakoitzera aurkeztutako zein izangai izan diren onartutak eta zein baztertuak, deialdian parte hartzeko.
  • Epaimahai kalifikatzaileak nola osatuko diren.
  • Lehen ariketa noiz izango den. Bi lanpostuen kasuetan lehen ariketa egun eta toki berean izango da: urtarrilaren 16an, 10:00etan, Orioko kultur etxean.

Euskararen Egunarekin banatu ziren udaletxean aurtengo EUSKARAZ GAZTE literatur lehiaketaren sariak

Sari-banaketa udalbatzarraren aretoan egin zen, abenduaren 3ko 19:00etan hasita, eta bertan izan ziren Euskara batzordeko buru Aitziber Campos eta zenbait zinegotzi, sarituekin eta epaimahaikideekin batera.

Argazkia Karkarak ateratakoa da.

Lehiaketaren epaimahaia honako hauek osatu dute aurten: Eli Manterolak, Karkara aldizkariaren izenean; Eli Lasa, Aiako Udaleko kultur teknikariak; eta Jabier Zabaleta, Orioko Udaleko Euskara Zerbitzuko teknikariak.

Ekitaldian adierazi zuten azpimarratzekoa dela aurten aurkeztutako lanen kalitatea.

LAN SARITUAK

Saritutako lan eta egileak hauek izan dira:

Ipuinak

1.- ‘Aitona ingelesa’ ipuina. Egilea: Iñaki Iturain.

2.- ‘Iker’ ipuina. Egilea: Mikel Iruretagoiena.

3.- ‘Gab(onak)’ ipuina. Egilea: Joxe Mari Unanue.

Accesita: ‘Baserria’ ipuina. Egilea: Ane Etxabe Usandizaga.

Accesita: ‘Katebegia’ ipuina. Egilea: Alazne Arruti.

Olerkiak/Bertsoak

1.- ‘Marearen kontra’ bertso-sorta. Egilea: Mikel Iruretagoiena.

2.- ‘Badira’ olerkia. Egilea: Iona Rekarte.

3.- ‘Argia’ bertso-sorta. Egilea: Rosi Lazkano.

Accesita: ‘Aurten bai!’ olerkia. Egilea: Garazi Urretabizkaia.

Accesita: ‘Mundua zapi bat balitz’ olerkia. Egilea: Alazne Arruti.

ABENDUAN ARGITARATUKO DIRA

Saritutako lanak Karkara aldizkariaren gehigarri batean argitaratuko dira abenduan, Gabonak baino lehenago kaleratuko den zenbakian. Ondoren, webgune honetan ere publikatuko dira.

Epaimahaiaren agiria (PDF)

 

Abenduan bi ikastaro antolatu ditu Udal Elkarteak lan bila dabiltzanentzat

Urola Kostako Udal Elkarteko laneko orientazio-zerbitzuak bi ikastaro berri eskainiko ditu abenduan.

Ikastaroen helburua da langabezian dauden pertsonei lana bilatzen laguntzea. 3 orduko iraupena izango dute eta doan izango dira. Ikastaro hauek eskainiko dira:

  • LAN ELKARRIZKETA: Lan-elkarrizketa entrenatuko duzu. Data: abenduak 13 (9:30-12:30); Hizkuntza: euskara
  • CURRICULUMA HODEIAN: Plataforma berriek nola funtzionatzen duten eta zertarako balio duten aztertuko duzu. Data: abenduak 18 (9:30-12:30); Hizkuntza: gaztelania

Izen-ematea eta informazioa

Enplegu Zentroa / Orientazio Zerbitzua
Tel. 943890808

Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.

Urola Kostako Udal Elkarteak laneko eta auto-enpleguko orientazio zerbitzua eskaintzen du Lanbide-Euskal Enplegu Zerbitzuaren eta Europako Gizarte Funtsaren EAEko 2014-2020 EGIF Programa Operatiboaren finantzaketarekin.

Asteburuan itxita izango da N-634 errepidea, Zarauzko bidean

Gipuzkoako Foru Aldundiak konponketa-lanak egingo ditu N-634 errepidean, Zudugarai inguruan. Hori dela-eta, zirkulaziorako erabat itxita izango da, Ubegun industrialdeko bidegurutzetik Zudugarai gaina arte. Zarautza joan nahi dutenek Aia aldetik egin beharko dute buelta: Santiagoerreka auzotik Andatzara eta handik Aiara, gero Zudugarai gainera jaisteko.

Lanak abenduaren 1eko goizeko 08:00etan hasiko dira, larunbatarekin, eta astelehen goizeko 06:00etan irekiko da errepidea ostera, 46 ordu geroago.

Azaroaren 30ean amaituko da ENPRESA EUSKARAZ HANDITZEN ekimenaren 2. deialdian izena emateko epea

Aia, Getaria, Orio, Zarautz eta Zumaiako enpresa txikiei euskaraz lan egiteko laguntza ematen jarraitzen dugu Urola Kostako Udal Elkartetik. Hurrengo ostiralean, azaroaren 30ean, amaituko da iaz abian jarritako ENPRESA EUSKARAZ HANDITZEN proiektuaren bigarren deialdian izena emateko epea.

Enpresa Euskaraz Handitzen

Gure eskualdeko enpresa txikiak euskaraz handitu nahi ditugu. Honela, Aia, Getaria, Orio, Zarautz eta Zumaiako enpresa txikietan euskararen erabilera sustatu nahi dugu, euskararen erabilera handituz, enpresa bera ere handituko baita.

Izan ere, euskararen normalizazioa bizitzaren esparru guztietara zabaltzea guztion zeregina eta ardura da, eta Urola Kostako Udal Elkarteak baditu baliabideak herritarren esku. Aurkezpen bideoan agertu nahi izan dugun eran, keinu txikiak izanagatik ere, aldaketa handia daiteke.

Urola Kostako Udal Elkarteak iaz ekin zion ekimenari. Lehendabiziko deialdian bailarako 12 enpresek hartu zuten parte; batez ere, osasun arloan diharduten hainbat enpresek. Euskarak enpresan duen presentzia indartu eta aldi berean, euskararekin enpresa handitzea helburu, ekimenak enpresa bakoitzaren errealitatera egokituko lana burutzea ahalbidetu du. Zenbait enpresentzat euskara-plan osoak diseinatu diren bitartean, beste kasu batzuetan itzulpenak egin, webguneak egokitu edota euskaratu, eta eguneroko lanerako ezinbestekoak diren dokumentu-ereduak landu dira. Egindako lana anitza bezain oparoa izan da.

Bigarren deialdiaren nondik norakoak

Programa honetan parte har dezakete Aia, Getaria, Orio, Zarautz eta Zumaiako enpresa txikiek (10 langile artekoek), sektorea eta jarduera edozein izanik ere. Bigarren deialdi honetan, hala ere, deialdi berezia egiten zaie hiru arlo hauetako enpresei: higiezinen zerbitzuak, finken administratzaileak eta aholkularitza etxeak.

Modu honetan, 10 langiletik behera dituzten enpresak hartu ditugu oinarri eta zerbitzua eta lana euskaraz eskaintzeko beharrezkoak dituzten tresna eta erremintak eskainiko dizkiegu:

  • bezeroekiko harremanetarako oinarrizko euskarri eta dokumentuak euskaraz jartzeko laguntza, oinarrizko zerbitzuak euskaraz egoki eskaintzeko
  • lana euskaraz egiteko urratsak emateko laguntza eta aholkularitza…

Informazioa eta izen-ematea

Parte hartu nahi duten enpresek izena eman behar dute, Udal Elkartearen webgunean dagoen formulario erraz bat betez edo helbide honetara mezu elektroniko bat bidaliz:

Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko..

Azaroaren 30ean amaituko da izen-emateko epea.

Guztiok egiten dugu Urola Kosta euskaldun, eta segi dezagun horretan. Zabaldu ditzagun euskararen ateak, gure hizkuntza eta gure enpresak handituz.

Luizi handia izan da Bentako bidean eta, ondorioz, itxita dago bidea bertakoentzat izan ezik

Atzoko euriteak luizi handia eragin du Bentako bidean eta errepidea kaltetuta geratu da, argazkian ikusi daitekeen bezala.

Teknikariek egoera aztertu eta konponketak egin bitartean, bidea ixtea erabaki du Udalak, bertakoentzat izan ezik. Izan ere, bidearen zati bat erori egin da eta, beraz, errepidea estututa dago tarte horretan. Bide-zati horretan ez dira bi auto kabitzen eta, segurtasuna bermatzeko, Udalak bidea ixtea erabaki du. Inguruko etxe eta baserrietan bizi direnek izango dute pasatzea; baina gainontzekoek, ez.

Udalak abisatuko du bidea berriro irekitzen denean.

Barkatu eragozpenak.

Zorionak Salatxo abesbatzari!

 

Zorionak Salatxo abesbatzari bere 25 urtebetzeagatik.

Lan eta ordu asko egon dira larunbatean eskainitako kontzertuan, baina egindako lan guzti horri esker, oriotar askok asko gozatu ahal izan genuen larunbatean.

Salatxo abesbatzaz gain, hainbat oriotarrek parte hartu zuten bertan: Harribil, Danbolin Musika Eskola, Xabier Lizaso, Gozategi, Olatz Zugasti… Benetan harro egoteko gaude Orion dugun artista mailarekin; beraz, zorionak parte hartu zenuten guztiei, eta, bereziki, Salatxo abesbatzari eta bere zuzendariari.

Lourdes Salsamendi

Kultura eta Turismo zinegotzia

Javier Otxandorena izango da Udalak deitutako garbitzaile-lanpostua beteko duena

Udalak garbiltzaile-lanpostu bat betetzeko egindako lehiaketa-oposizioko fase guztiak amaitu ondoren, epaimahai kalifikatzaileak azken emaitzaren berri eman du:

Garbitzaile-lanpostuaren lehiaketa-oposizioaren emaitza (PDF)

Epaimahai kalifikatzaileak, emaitza hori aintzakotzat hartuz, Javier Otxandorena izendatzeko proposamena egin du, bera izan delako puntuaziorik altuena lortu duena.

Probak gainditu dituzten gainerako izangaiekin lan-poltsa bat osatuko da.