Laneko arriskuei buruzko prestakuntza emango die Udal Elkarteak eskualdeko enpresa txikiei

Urola Kostako Udal Elkarteak Mikropreben programa abiatu du, beren lan-jardunean prebentzioa integratu nahi duten enpresa txikiei zuzenduta. 25 langile arteko enpresei zuzentzen zaie Mikropreben programa eta kosturik ez du enpresentzat.

Enpresa guztiek ez dituzte ezaugarri berak eta neurrira egindako prebentzio-kudeaketa beti izango da eraginkorragoa. Horretarako, ezinbestekoa da gutxieneko prestakuntza jaso eta beharrezko dokumentazio guztia prestatzea.

Jasotako prestakuntzaren bidez, enpresen arduradunak gai izango dira prebentzioaren kudeaketa beren gain hartzeko; hau da, beren lan-jardunari dagozkion laneko arriskuak identifikatu eta legeak eskatzen duen dokumentazioa prestatu eta lantzeko.

Prestakuntza teoriko-praktikoa

Programa honetan parte hartzen duten enpresek, batetik, prestakuntza teoriko nahiz praktikoa jasoko dute (azaroan zehar, 10 saio) eta, ondoren, aukera emango zaie beren enpresako prebentzio-plana idazteko laguntza eta aholkularitza jasotzeko. Aldi berean, enpresa txikiei egokitutako dokumentazioa eskainiko zaie, ulerterraza, erabat aplikagarria eta elebitan: euskaraz eta gaztelaniaz.

Programaren xehetasunak

Guztira, 30 orduko prestakuntza eskainiko zaie enpresei  Urola Kostako Udal Elkartearen egoitza nagusian. Zehazki, hilabeteko iraupena izango du ikastaroak: azaroaren 5ean hasi eta 26ra arte. Arratsaldez izango da ikastaroa, 14:00etatik 17:00etara, 3 orduko 10 saiotan. Eskolak astelehen, asteazken eta ostiraletan izango dira.

Gai hauek landuko dira ikastaroan:

  • Laneko segurtasun eta osasun arloko oinarrizko kontzeptuak
  • Arrisku orokorrak eta beren prebentzioa
  • Arrisku espezifikoak jardueraren arabera eta beren prebentzioa
  • Lan arriskuen prebentzioa kudeatzeko oinarrizko arloak
  • Lehen sorospena

Programa egonkorra eta gomendagarria

Gutxienez pertsona bat kontratatua duen enpresak lan arriskuen prebentzioaren arloko 31/1995 Legea bete behar du. Kontuan hartzekoa da:

  • Legearen aurrean, enpresaburua dela arduradun bakarra.
  • Ez-ezagutzak ez duela erantzukizunetatik salbuesten.
  • KPZ kontratatzeak ez duela enpresaburua erantzukizunetatik salbuesten.

Urola Kostako Udal Elkartea 2010ean hasi zen Mikropreben programa antolatzen eta aurtengo hau programaren 7. edizioa da. Orain arteko edizioetan eskualdeko 39 enpresak parte hartu dute.

Informazioa eta izen-ematea

Mikropreben programan izena emateko epea urriaren 26an amaituko da.

Izena emateko edota informazio gehiago jasotzeko, idatzi email bat edo jarri harremanetan telefono bidez:

  • Urola Kostako Udal Elkartea
  • Tel.  943 890808
  • Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. (Rakel Calvo)
  • http://www.urolakosta.eus/eu/mikropreben

 

Familia-turismoa sustatuz Urola Kostan: “Familiz-family”

Urola Kostan familia-turismoa sustatzekoa helburuarekin “Familiz-family” izeneko eskaintza-sorta prestatu dute eskualdeko eragile turistikoek. Urriaren azken astebururako ondu da pakete turistiko hau, gurera datozen familiei begira.

Urola Kostako eragile turistikoen helburua da eskualdeko eskaintza turistikoa dibertsifikatzea eta udako hilabeteetatik kanpo ere indartzea, gure herriek urte osoan dute-eta zer eskainia bisitariei.

Ekimena beste urrats bat da sektorea sendotzen jarraitzeko eta bisitariei aukera ematen die balio-erantsi nabarmena duten esperientziez gozatzeko.

Bentako bidea itxita izango da ostegunean eta ostiralean, obrengatik

Udalak konponketa-lanak egin behar ditu Bentako bidean eta, horren ondorioz, itxita izango da bi egunez: ostegunean eta ostiralean. Errepideko zuloak fresatu eta asfaltatu behar dira eta, lan horiek egiten diren bitartean bidea itxita izango da inguruko etxeetean bizi direnentzat izan ezik.

Barkatu eragozpenak.

Udalak eta Garabide elkarteak hitzarmena sinatu dute, elkarlan bidean sakontzeko

Hitzarmena sinatzeko ekitaldia Orioko udalbatzarraren aretoan egin da, gaur eguerdian eta bertan parte hartu dute Jose Angel Zaldua alkateak eta Andoni Barreña Garabideko presidenteak.

Udalak eta Garabidek 2013an sinatu zuten hitzarmen bat lehenbiziko aldiz eta horren indarraldia 2017an bukatu zen. Orain berritu egin dute eta hitzarmen berriaren indarraldia 2019ko abenduan bukatuko da.

Urriaren 19an bukatuko da epea eskabideak aurkezteko enpresak sortzeko eta inbertsioetarako diru-laguntzetarako

Urola Kostako Zuzendaritza Batzordeak martxoaren 15ean onartu zituen ekintzailetasuna, enplegua, inbertsioak eta lankidetza-egitasmoak sustatzeko 2018ko diru-laguntza deialdiaren oinarriak. Guztira, 4 lerrotan banatuta, 305.000 euro emango dira diru-laguntzatan.

Diru-laguntzetako 2 lerroetan eskabideak aurkezteko epea hurrengo ostiralean, urriaren 19an, amaituko da.

8 peoi eta bi teknikari hartuko ditu Urola Kostako Udal Elkarteak sei hilabeterako

Urola Kostako Udal Elkarteak 10 pertsona kontratatuko ditu aldi baterako enplegua sustatzeko 2018ko Enplegu Planaren bidez. Lehentasuna izango dute emakumeek, DBE/RGI jasotzen duten pertsonek eta 55 urtetik gorako pertsonek. Enplegu plana Lanbidek finantzatzen du.

Enplegua sustatzeko deialdi honen xedea da laneratzeko zailtasun bereziak dituzten pertsonen enplegagarritasuna handitzea aldi baterako lan-esperientziaren bidez, pertsona horien kualifikazioa eta/edo gaitasun pertsonalak eta motibazioa handitzeko.

Martxa onean hasi da lanean euskaltegia

Urriaren 1ean hasi ziren klaseak Orioko euskaltegian eta, guztira, 60 bat ikasle arituko dira euskara ikasten ikasturte honetan.

Lau talde presentzial sortu dira: hasiera mailako bi, bat goizean eta beste bat arratsaldean; B1 mailako talde bat, arratsaldez; eta B2-C1 mailako beste bat, hau ere arratsaldetan. Talde horiez gain, 21 ikasle daude, autoikaskuntzan ari direnak, bakoitza bere maila eta helburuarekin.

Enpresa kudeatzeko ikastaroa, pertsona ekintzaileei edota mikroenpresetako enpresariei bideratuta

“Ekiten, ekintzaile eta enpresarien ekosistema” egitasmoaren barruan, Urola Kostako Udal Elkarteak beste ikastaro bat jarri du martxan.

Ikastaroaren helburu nagusia da ekintzaile nahiz enpresariengan beren ideia edo enpresei buruzko  hausnarketa sustatzea. Horrekin batera, hainbat erreminta eskainiko zaizkie parte hartzaileei, kudeaketa eraginkorragoa lortzeko.

Bi ikastaro antolatu ditu Udal Elkarteak langabeentzat

Urola Kostako Udal Elkarteko laneko orientazio zerbitzuak bi ikastaro eskainiko ditu urrian.

Ikastaroen helburua da langabezian dauden pertsonei lana bilatzen laguntzea. 3 orduko iraupena izango dute eta doan izango dira. Ikastaro hauek eskainiko dira:

Bide-heziketa ikastaroa jasotzen ari dira bi eskoletako haurrak

Hirugarren urtea da Udalak bide-heziketa ikastaroa antolatzen duela herriko haurrentzat. Mikal Etxeberria udaltzainak ematen du ikastaroa Orioko bi ikastetxeetan eta horretan arituko da urria osoan.

Harakintza industrian hasi nahi dutenentzako ikastaroa antolatu du Udal Elkarteak

Urola Kostako Udal Elkartearen eskutik, “Harakintza eta Haragikien elaborazioa” 2. mailako profesionaltasun-ziurtagiria eskuratzeko aukera izango dute eskualdeko langabeek. Azaroaren hasieran hasi eta 5 hilabeteko prestakuntza epea izango da. Zabalik dago izen-ematea urriaren 11 bitartean.

HAZIren eskutik, Lanbide-Euskal Enplegu Zerbitzuak eta Ekonomiaren Garapen eta Azpiegitura sailaren ekimenez, “Harakintza eta Haragikien elaborazioa” izeneko 2. mailako profesionaltasun-ziurtagiria eskuratzeko aukera izango dute eskualdeko langabeek. Iraurgi Berritzen eta Urola Kostako Udal Elkartearen laguntzarekin eta Urkaiko eta Basatxerri enpresekin elkarlanean antolatu da ikastaroa.

Urriko jardueren programa argitaratu du Udalak

Udalak kaleratu berri du urriko kultur jardueren programazioa. Honako ekitaldi hauek osatzen dute programa:

URRIAK 2, asteartea

17:45 Hitzaldia Salatxo aretoan, Haurreskolako guraso batzordeak antolatuta. Gaia:  'Konpondu dezakegu. Gatazkak gainditzeko modu baketsu eta boteretsuan'. Hizlaria: Nerea Mendizabal psikopedagogoa.

URRIAK 6, larunbata

Euskal Herriko SUP Race Zirkuitua-Orio 2018. Arraun-surfeko txapelketa eta egun osoko festa.

URRIAK 13, larunbata

17:00 Orioko eta Zarauzko musika eskoletako trikitilari eta txistularien kalejira herrian barrena

18:00 ‘Beldartxo jatuna’ antzerkia Herriko Plazan

19:00 Bisiguaren 'master-class'a erretegian: bisigu dastaketa, aperitiboa eta txakolina. Aurrez eman behar da izena

URRIAK 16, asteartea

18:00 Pello Añorga ipuin kontalariaren saioa kultur etxeko areto nagusian (5-8 urte arteko haurrentzat)

19:00 Solasaldia Arraunetxen: ‘Oteizarekin batetik bestera’, ‘Oteiza 110’ programaren barruan

  • Oskar Alegria, kazetari eta zinemagilea
  • Bernardo Atxaga, idazlea

URRIAK 18, osteguna

19:00 ‘Oteiza: 1908-2008 y sigo’ dokumentalaren proiekzioa kultur etxean, ‘Oteiza 110’ programaren barruan

URRIAK 19, ostirala

11:00 Herriko haurren omenaldia Oteizari ‘Pietatea’ren azpian, ‘Oteiza 110’ programaren barruan

22:30 ’Ttak!’ Beatriz Egizabalen bakarrizketa kultur etxeko areto nagusian, EUSKARALDIAren barruan

URRIAK 20, larunbata

10:00 Egun osoko irteera Altzuzako Oteiza museora eta Iruñera, ‘Oteiza 110’ programaren barruan. Izena urriaren 16a baino lehen eman behar da telefonoz edo emailez

URRIAK 21, igandea

18:30 ‘Esku Harriak: Oteizaren (h)aria’ dantza-bertso-musika ikuskizuna Herriko Plazan, MugMus Laborategiaren eskutik, ‘Oteiza 110’ programaren barruan

URRIAK 22, astelehena

18:00 Miriam Mendoza ipuin kontalariaren saioa kultur etxeko areto nagusian (3-6 urte arteko haurrentzat)

URRIAREN 26tik 28ra

Mandalara elkarteak antolatutako ekitaldiak Arraunetxen.

OHARRA
Urriaren 3tik aurrera, asteazkenero bingoa kultur etxean 16:30ean.