“Komunikazioaren balioa salmenta-prozesuan” prestakuntza-tailerra antolatu du Udal Elkarteak

Urola Kostako Udal Elkarteak, "EKITEN, ekintzaile eta enpresarien ekosistema" egitasmoaren barruan, beste prestakuntza-tailer bat eskainiko du ekintzaile eta enpresari txikientzat. “Komunikazioaren balioa salmenta-prozesuan” tailerrak oso harrera ona izan duela ikusita, Udal Elkarteak beste bat antolatzea erabaki du, erabat praktikoa izango dena.

Komunikazioaren balioa salmenta-prozesuan

Eskualdeko ekintzaile eta enpresari txikiei bideratutako saioaren helburua hau da, funtsean: salmenta-prozesuak hobetzeko estrategia eta erremintak eskaintzea; kasu honetan, fokua komunikazioan jarrita. Gaur egun, marketing arazorik larriena zera da: salmenta-prozesuan huts egiten duela komunikazioak, ez dela modu eraginkorrean erabiltzen. Saio praktiko honen bitartez, bezeroarekiko komunikazio egokia lortzeko metodologia eta hainbat tresna erakutsiko zaizkie parte-hartzaileei.

Eusko Jaurlaritzak etxebizitzaren erabilerari buruzko inkestak pasatuko ditu etxez etxe Orion

Eusko Jaurlaritzako Ingurumen, Lurralde Plangintza eta Etxebizitza Sailak Etxebizitzaren erabilerari buruzko inkesta bat jarri du martxan eta, lan zabal horren barruan, Orioko zenbait etxebizitza ere bisitatuko ditu egun hauetan.

Inkestaren helburua da ohiko bizilekua ez diren etxebizitzen fenomenoa aztertzea; horretarako, okupatu gabe dauden etxebizitzen kopurua kalkulatuko dute eta etxebizitza horien egoera eta ezaugarriak aztertuko dituzte.

Ikertalde SA enpresa arituko da etxez etxe inkestak pasatzen eta behar bezala identifikatuta agertuko dira etxeetara.

Gaurko egunez hasi dira inkesta horiek pasatzen eta egun batzuk beharko dituzte guztiak egin eta Orioko lana bukatzeko. Ez dituzte etxebizitza guztiak pasatuko, baizik-eta aukeratutako lagin bat.

Udalak laguntza eskatzen die herritarrei, inkestatzaile horiek lana behar bezala egin ahal izan dezaten eta informazio zuzena jaso dezaten

Udalak bat egin du gehiengo sindikalarekin eta herritarrak deitu ditu ostiral eguerdian elkarretaratzera

Kataluniako hainbat buruzagi politiko eta soziali ezarri dizkieten zigorrak direla-eta, Euskal Herriko gehiengo sindikalak (ELA, LAB, STEILAS, ESK, ETXALDE, HIRU) langileen elkarretaratzeak deitu ditu bihar ostiralerako, urriak 18, ‘Erreferenduma ez da delitua. ASKATASUNA’ lelopean.

Orioko Udalak bat egin du deialdiarekin eta herritarrak deitu ditu Orioko elkarretaratzean parte hartzera.

Osteguneko azoka tokiz aldatuko da, plazako obra dela-eta

Herriko Plaza obragatik itxita dagoenez, ostegun goizeko azoka tokiz aldatuko du Udalak. Datozen asteotan kiroldegiaren eta Arantzazuko Andra Mariko etxebizitzen artean kokatuko da azoka, argazkian eta planoan horiz markatuta ikusi daitekeen tokian.

Aurreko egunotan Udalak bilerak egin ditu azokako postuak jartzen dituztenekin eta, hainbat aukera aztertu ondoren, inguru horretan egitea adostu dute.

azokarenplanoaBI19

Egoitz Dorronsoro gaztea izango da Euskaraldiaren dinamizatzailea Orion eta Aian

Euskaltzaleen Topaguneak kontratatu du, lan erdiz, Udal Elkartearekin sinatutako hitzarmenari esker.

Topaguneak eta Urola Kostako Udal Elkarteak euskararen normalizazioa sustatzeko lankidetza-hitzarmena sinatu dute eta horren aurkezpena egin zuten atzo Zarautzen, Udal Elkartearen egoitzan. Aurkezpen-ekitaldian parte hartu zuten, baita ere, Lourdes Salsamendi Udal Elkarteko presidenteak eta Kike Amonarriz Topaguneko presidenteak, biak ere kargua hartu berriak.

Hitzarmen horri esker Topaguneak hiru dinamizatzaile hartu ditu, eskualdean Euskaraldia dinamizatzeko: Egoitz Dorronsoro, Orio eta Aiarako; Alazne Aizpurua, Zarautzerako; eta Sara Saizar, Zumaia eta Getariarako. 15 hilabeteko kontratua egin zaie hiru gazteei: 2019ko urrian hasi eta 2020ko abenduaren bukaera arte.

Itxita geratu da Herriko Plaza, obrengatik

Aritzaga eta Herriko Plazako saneamendua berritzeko eta inguruaren antolamendua hobetzeko obren barruan, Herriko Plaza itxi dute gaur goizean, kioskoa desmuntatzeko eta lurzorua altxatzeko.

Datozen hilabeteotan, beraz, plaza itxita izango da. Oraingoz, ibilgailuen zirkulazioa ez da aldatuko, baina, obrak aurrera egin ahala, aldaketak izango dira eta Udalak jakinaraziko ditu aurrez.

'Euskaraz Gazte' literatur lehiaketaren deialdia egin du Udalak

Udalak urtero antolatzen duen 'Euskaraz Gazte' literatur lehiaketak 26. edizioa du aurtengoa.

Lanak aurkezteko epea dagoeneko zabalik dago eta hala egongo da 2019ko azaroaren 15a arte.

16 urtetik gorako edozein oriotar edo aiarrak parte har dezake lehiaketan.

Lehiaketaren oinarriak

Hemen ikus daitezke lehiaketaren oinarriak:

Asteazkenean hasiko dira Kofradia zaharreko hormak eraisten

Kofradia zaharreko eraikina botatzeko lanak aurrera doaz eta, lan horien barruan, datorren asteazkenean, urriak 9, hasiko dira eraikinaren kanpoko hormak eraisten.

Atzeko oinezko bidea, itxita

Eraisketa-lanek hiruzpalau egun iraungo dute eta, bitartean, Kofradiaren atzeko oinezko bidea itxita izango da jendearentzat, segurtasunagatik.

Behin eraikina eraitsi eta bidea hondakinez garbitu ostean, berriro irekiko da pasaera.

Ibilgailuen zirkulazioa aldatu egingo da plazan, larunbateko arraun-surfeko festa dela-eta

Larunbatean, urriak 5, arraun-surfeko festa ospatuko da Orion, hirugarren urtez segidan. Egun osoko festa izango da, goizeko 11:00etan hasi eta gaua arte luzatuko dena.

Hau da festaren programa:

ArraunSurfa19

Moila itxita ibilgailuentzat

Festa horren barruan hainbat jarduera antolatuko dira errioan eta moilan eta, hori dela-eta, Udalak erabaki du aldaketa bat egitea ibilgailuen zirkulazioan: goizetik hasita, moila itxita izango da ibilgailuentzat eta, beraz, oinezkoentzat geratuko da erabat. Herrira autoz sartzeko, botika ondoko bidea erabili beharko da, asteburuetan oinezkoentzat izaten dena. Herritik ateratzeko, berriz, asteburu guztietan bezala, Txanka-Hondartzako bidea erabili beharko da.

Larunbat gauean plaza inguruan autorik ez aparkatzeko eskatzen du Udalak, festa-eremua libre izateko.

Igandean, ostera, betiko moduan antolatuko da zirkulazioa.

KONPETENTZIEN ESKOLA izeneko zerbitzua sortu du Udal Elkarteak, eskualdeko langileen kualifikazio-beharrei erantzuteko

Hasteko, bi ikastaro antolatu ditu: “Izan-be digital” eta “45+Indartzen”. Izena emateko epea irekita dago urriaren 25era arte.

Urola Kostako Udal Elkarteko Enplegu eta Lan-orientazio Zerbitzuak KONPETENTZIEN ESKOLA zerbitzu berria abiarazi du. Funtsean, pertsonen, gizartearen, enpresen eta sektore ekonomikoen kualifikazio-beharrei erantzuteko jaio da eskola. Eskualdeko enpresetan kultura eraikitzailea indartzen lagundu nahi du Udal Elkarteak, etengabeko ikaskuntza sustatuz eta trebakuntzaren bidez. Bi alorretan eragin nahi du: batetik, pertsonen laneratzea erraztu eta beren aurrerabide profesionala suspertu; eta, bestetik, eskualdeko erakunde nahiz enpresen errendimenduan eragin.

KONPETENTZIEN ESKOLAren baitan, bi prestakuntza berri eskainiko dira urte amaiera bitartean: “45+ indartzen” egitasmoa eta “Izan-Be digital” ikastaroa.

Hautesle-errolda ikusgai dago udaletxean, kontsultak egin eta erreklamazioak aurkezteko

2019ko azaroaren 10ean egingo diren Diputatuen Biltzar eta Senaturako Hauteskundeak direla-eta, jendaurrean daude dagoeneko hautesleen zerrendak (bai Orion bizi direnena eta bai atzerrian bizi baina Orion erroldatuta daudenena).

Hautesle-zerrenda jendaurrean izango da udal-bulegoetan irailaren 30etik urriaren 7ra bitartean, biak barne, 8:30etik 14:30era, astelehenetik ostiralera.

Hautesleek aukera daukate, epe horren barruan, hautesle-zerrendako datuak zuzenak diren ala ez aztertzeko eta erreklamazioak aurkezteko. Erreklamazioa aurkeztekotan, hautesleak berak edo behar bezala baimendutako pertsona batek aurkeztu eta sinatu behar du eta nortasun-agiriaren, gidabaimenaren edo pasaportearen kopia erantsi behar dio.

Udalak gai honi buruz kaleratu duen iragarkia hemen ikus daiteke, bi hizkuntzatan:

Hautesle-zerrendak jendaurrean. Iragarkia PDF formatuan

Urriko eta azaroko jardueren programa argitaratu du Udalak

Udalak kaleratu berri du urriko eta azaroko kultur jardueren programazioa. Ekitaldi hauek osatzen dute programa:

URRIAK 5, LARUNBATA
Euskalsurf SUP Race Zirkuitua-Orio 2019. Arraun-surfeko txapelketa eta egun osoko festa.

URRIAK 8, ASTEARTEA
18:00 Alzheimerrari buruzko hitzaldia kultur etxean, AFAGI elkarteak antolatuta

URRIAK 14, ASTELEHENA
18:00 Miriam Mendoza ipuin kontalariaren saioa kultur etxeko areto nagusian (3-6 urte arteko haurrentzat)

URRIAK 18, OSTIRALA
22:00 Gari & Maldanbera taldearen kontzertua kultur etxean. Sarrerak 10 euro balio du eta aldez aurretik hartu behar da bertan