Miriam Mendoza ipuin-kontalaria izango da martxoaren 16an kultur etxean

Liburutegiak aldian behin antolatzen dituen ipuin-kontaketa saioetako bat izango da datorren astelehenean, martxoak 16, 18:00etan hasita.

Miriam Mendoza ipuin-kontalariak emango du saioa. Miriam ezaguna da Orioko haurrentzat, lehenago ere askotan etorri izan da-eta liburutegira.

Saioa kultur etxeko areto nagusian egingo da eta 3 eta 6 urte arteko haurrentzat eta gurasoentzat da.

UEMAk gazte-topaketa ibiltaria antolatu du aurten ere

Zumaiatik abiatuko da aurtengo topaketa ekainaren 29an eta Lekeition bukatuko da uztailaren 5ean. UEMAk antolatu du gazte-topaketa, Eusko Jaurlaritzaren babesarekin eta Zumaia, Deba, Lekeitio eta Ondarroako udalen laguntzarekin. Hau da topaketa ibiltariaren helburua: gazteak euskararen inguruan sentsibilizatzea, kontzientziatzea eta eragile aktibo bihurtzea.

50 gazterentzako lekua izango da, eta martxoaren 31 bitartean zabalik dago izena emateko epea.

Herriko aparkalekuei buruzko gogoeta abiatuko du Udalak

Datorren ostegunean, martxoak 12, izango da lehenbiziko gogoeta-saioa eta gaiarekin interesa duten herritar guztiak gonbidatu nahi ditu Udalak. Saioa kultur etxean izango da eta 19:00etan hasiko da.

Herriko aparkalekuei buruzko gogoeta egin nahi du Udalak herritarrekin batera eta, horretarako, zenbait gogoeta-saio antolatu ditu, gaia guztion artean lantzeko. Ostegunekoa izango da aurreneko saioa.

Saioa euskaraz izango da eta herritarrek aukera izango dute beren ekarpenak euskaraz nahiz gaztelaniaz egiteko.

Euskara eta turismoa uztartuko dituen kanpaina aurkeztuko zaie Orioko turismo-eragileei

Orioko Udalak herriko denda, taberna, jatetxe eta alojamenduak gonbidatu ditu bi informazio-saiotara:

  • Martxoaren 10ean, 14:00etan, Salatxo aretoan, euskaraz
  • Martxoaren 26an, 17:00etan. Salatxo aretoan, gaztelaniaz

Bi informazio-saio horietan kanpainaren xehetasunak emango dituzte UEMAko eta Udaleko teknikariek. Saioak irekiak dira eta herriko denda, taberna, jatetxe eta alojamendu guztiek parte hartu dezakete.

Bi dira Aste Santuan abiatuko den kanpainaren helburu nagusiak: turismo-sektorean euskarari dagokion garrantzia ematea, eta gure hizkuntza eskaintza turistikoaren barruan sartzea.

Udako lanpostuen deialdia egin du Udalak

Udalak hainbat pertsona hartuko ditu lanerako uda honetan, eta deialdia egiten du lanpostu horiek betetzeko.

Deialdian parte hartzeko, langabetua izan behar da eta Orion erroldatua (txu-txu trenaren gidari, udaltzain laguntzaile eta turismo bulegorako lanpostuetarako ezik), gutxienez 2020ko urtarrilaren 1az geroztik. Hartuko diren langileen kontratuak lan-zuzenbidezko erregimenean egingo dira, denboraldi baterako.

Ikusi hemen lan-deialdiaren zehaztasunak:

Udako lanpostuak 2020

«Orio eta itsas ondarea» bisita gidatua antolatu du Done Jakue Bidearen Interpretazio Zentroak

Martxoaren 14an, larunbatarekin, bisita gidatua eskainiko du Done Jakue Bidearen Interpretazio Zentroak Orion, herriko itsas ondareari buruz.

Bisita Goiko Kaleko Pilliku plazan hasiko da 11:00etan eta doan izango da. Hala ere, parte hartzeko, erreserba egin behar da, aldez aurretik, turismo bulegora deituta: 943 835 565.

Martxoaren 8ko ekitaldietan parte hartzeko gonbita egin dute Orioko Ahalduntze Eskolak, Udalak, Etxeluze gaztetxeak eta Xaltxerak taldeak

Orioko Ahalduntze Eskolak, Udalak, Etxeluze gaztetxeak eta Xaltxerak taldeak elkarlanean antolatu dute martxoaren 8ko programa:

9.30 Txokolate-banaketa Aritzaga kalean.

10.00 Zumba feminista Aritzaga kalean.

11.30 Eguerdiko manifestaziorako materiala sortzeko elkarketa Ibai-Ondo plazan. Euria egiten badu, frontoian.

13.00 Manifestazio zaratatsua Antolatu indarrak, batu borroka feministara lelopean. Ibai-Ondo plazatik abiatuta.

14.30 Emakumeon* bazkari autogestionatua gaztetxean. Ondoren, mikro irekia.

Datorren asteazkenean, martxoak 11, bukatuko da epea kultura eta gazteria alorreko dirulaguntzak eskatzeko

Kultura eta gazteria alorreko eskariak martxoaren 11rako aurkeztu behar dituzte herriko elkarteek.

Eskariak udaletxeko erregistroan aurkeztu behar dira.

«Evaren alabak» antzerki-emanaldia izango da Orion martxoaren 13an

Martxoaren 13an, ostiralarekin, «Evaren alabak» kale-ikuskizuna izango da Orion.

Antzerkiaren bi saio izango dira, elkarren segidan: lehenbizikoa 21:00etan hasita, eta bigarrena, berriz, 21:45ean. Saio bakoitzerako 30 bat sarrera salduko dira. Bi saioak toki beretik abiatuko dira: Zakilaneko aldapatik, Pietatearen azpitik; handik zimitorio zaharrera joango dira aktoreak eta ikusleak eta, bukatzeko, Salatxo aretora joko dute.

Euskalmetek alerta laranja aktibatu du 12:00etatik 18:00etara, itsaso zakarragatik

Egun hauetan euskal kostaldea jotzen ari ekaitza dela-eta, Euskalmetek igo egin du alerta-maila, horian zegoena, eta alerta laranja aktibatuko du gaur, martxoak 3, 12:00etatik 18:00etara.

Udaltzaingoak debekatu egin du hondartza aldeko arrisku-guneetan ibiltzea alerta aktibatuta dagoen bitartean eta zuhurtzia eskatu die herritarrei, egoera arriskutsuak saihesteko.

Goizez ere irekita izango da udal-liburutegia aurrerantzean

Martxoaren 2tik aurrera udal-liburutegiak ordutegi zabalagoa izango du eta goizez ere irekita izango da. Hala erabaki du Udalak eta, horretarako, udal-liburutegiaren arduradunaren lansaioa handitu du: lehen egun erdiz egiten zuen lan eta, hemendik aurrera, egun osoz arituko da. Otsailaren 27ko udalbatzarrean erabaki zuen Udalak aldaketa hori, aho batez.

Udal-liburutegiaren ordutegia, hortaz, hau izango da aurrerantzean: 10:00etatik 13:00etara eta 16:00-19:30era.

San Pedro jaietako proposamenak bidaltzeko deia egin du Kultura Sailak

Orioko Udaleko Kultura Sailak, aurtengo San Pedro jaietako festa-batzordea antolatzen hasi aurretik, herritarrei, herriko elkarteei eta eragileei beren proposamenak aurrez bidaltzeko deialdia egiten die.

Proposamen denak, mesedez, Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo. helbidera igortzea eskatzen du Udalak.

Festa-batzordearen lehenengo bilera martxoaren 10ean izango da, arratsaldeko 19:00etan Kultur Etxean

 

 

Este sitio web utiliza cookies propias y de terceros para optimizar su navegación y realizar labores analíticas. Al continuar navegando entendemos que acepta nuestra política de cookies.