Udalak ostiralean emango du udaberriko programaren berri, baina horren aurretik, datozen egunetan egingo diren bi saio iragarri ditu: apirilaren 6an, igandearekin, Frankenstein agurgarria errezitaldi musikatua, eta apirilaren 11n, ostiralarekin, Verde Pratoren kontzertua. Bi kasuetan, sarrerak salgai jarri dira turismo-bulegoan, eta aurrerantzean online ere eskuratu daitezke.
‘Frankenstein agurgarria’
Ana Galarraga zientzia-dibulgatzaileak eta Petti musikagileak igande honetan egingo dute Frankenstein agurgarria emankizuna: 18:00etan kultur etxean. Mary Shellyk duela 200 urte pasatxo idatzitako Frankenstein liburutik abiatuta, obra horrek planteatutako galderei erantzuten saiatuko dira ikuspegi feminista, historiko, filosofiko eta etikotik.
Sarrerak hemen eskuratu daitezke, 5 euroan, baita turismo-bulegoan ere.
Verde Prato
Verde Pratoren emanaldia, aldiz, datorren ostiralean izango da, 22:00etan kultur etxean. Ana Arsuaga musikagile tolosarrak Bizitza eztia lan berria kaleratu du Dozzy italiarrarekin elkarlanean, eta doinu berri horiek entzunaraziko ditu Orion emango duen saioan.
Sarrerak hemen erosi daitezke, 10 euroan, baita turismo-bulegoan ere.
