Albisteak

Miriam Mendoza ipuin-kontalaria izango da urriaren 5ean kultur etxean

Liburutegiak hilero antolatzen dituen ipuin-kontaketa saioetako bat izango da datorren astelehenean, urriak 5, 18:00etan hasita.

Miriam Mendoza ipuin-kontalariak emango du saioa. Miriam ezaguna da Orioko haurrentzat, lehenago ere askotan etorri izan da-eta liburutegira.

Saioa kultur etxeko areto nagusian egingo da eta 3 eta 6 urte arteko haurrentzat eta gurasoentzat da.

Gonbita hartu behar da, aldez aurretik

COVID-19aren pandemiak sortutako egoerak behartua, ekitaldiak 30 laguneko aforo mugatua izango du eta, hori dela eta, bertaratu nahi dutenek gonbita jaso beharko dute aldez aurretik kultur etxean bertan.

Atzo egin zen Aranzadik eta Udalak antolatutako zikloko lehen hitzaldia

Aranzadi elkarteak eta Udalak Orioko memoria historikoa eta gertuko memoria lantzeko abian jarri duten egitasmoaren barruan, bi hitzaldi antolatu dituzte eta atzo izan zen lehenbizikoa. Gerra zibilaren eta frankismoaren garaian emakumeek bizi izandako jazarpenak ezagutzeko aukera izan zuten bertaratuek, Lurdes Herrasti EHUko irakaslearen ahotik.

Datorren asteazkenean, urriak 7, izango da bigarren hitzaldia, kultur etxean, 19:00etan hasita: «Biktimen politikak: azterketa kritikoa». Hizlaria Jon Landa izango da, EHUko Zuzenbide Penaleko katedraduna.

Urriaren 9a arte dago zabalik Haurreskolan izena emateko epea

Haurreskolan matrikulatzeko epea gaur bertan, urriak 1, zabaldu da eta irekita egongo da urriaren 9ra arte.

Matrikulatzeko, haurrak jaiota izan behar du.

Orain matrikulatzen diren haurrak abendutik aurrera hasiko dira haurreskolan.

Izena emateko ordutegia hau izango da: goizez, 11:30etik 14:30era.

Eman izena Mintzalagun programan, euskara praktikatzeko

Mintzalagun programak hizkuntza praktikatzeko aukera ematen die euskara-ikasleei eta beren maila hobetu nahi dutenei, euskaldun zaharrekin harremanetan. Talde txikitan juntatzen dira astean behin, ordu betez, honetaz eta hartaz hitz egiteko, kafe bat hartzen duten bitartean edota paseatzen duten bitartean. Baliabide ezin hobea da euskaraz gehiago eta hobeto egin nahi dutenentzat. Aldi berean, oso egitasmo interesgarria da euskaraz lagun berriak egin eta euskara ikasten ari direnei lagundu nahi dieten herritar euskaldunentzat.

Urola Kostako Udal Elkarteak kudeatzen du Mintzalagun programa eta AEK-k bideratzen du Zumaia, Getaria, Zarautz, Aia eta Orion.

«Errepresioa genero ikuspegitik» hitzaldia izango da asteazkenean, kultur etxean

Aranzadi elkarteak abiatu berri duen lanaren barruan, hitzaldia antolatu du irailaren 30ean, asteazkenarekin, 19:00etan hasita: «Errepresioa genero ikuspegitik. Hizlaria Lourdes Herrasti izango da, Aranzadiko kidea eta Historian doktorea EHUn.

Hitzaldia irekia da parte hartu nahi duten guztientzat, baina, COVID-19ak sortutako egoera dela eta, izena eman behar da aldez aurretik, aforoa kontrolatu ahal izateko. Hitzaldira joan nahi duenak telefono honetara deitu behar du aldez aurretik, izena emateko: 685 720 032.

Gaur hasi dira plaza inguruko zoladura jartzeko lanak

Gaurko egunez hasi dira jartzen Aritzaga-Endaia-Herriko Plaza inguruko zoladura eta, hainbat atzerapen eta gero, gauzak ondo bidean, abenduan bukatuta geratuko da obra.

Nahi baino luzeago

Obra nahi baino gehiago luzatu da eta, batez ere, asko atzeratu da zoladura jartzea.