Buffalo taldeak kontzertua emango du Orioko kultur etxean datorren martxoaren 15ean, ostiralarekin, 22:00etan hasita.
Sarrera doan bada ere, gonbita hartu behar da aldez aurretik, aretoaren aforoa mugatua delako. Udalak 100 gonbita prestatu ditu eta dagoeneko eskuratu daitezke kultur etxean bertan. Emanaldira joan nahi dutenek, hortaz, hobe dute garaiz hartu beren gonbita, gabe ez geratzeko.
Buffalo taldea
Buffalo taldea Zarautzen sortu zen 2008an. Talde instrumentala da eta musikari hauek osatzen dute: Ander Ederrak (gitarra), David Gorospek (bateria) eta Joanes Ederrak (baxua).
Hirurek esperientzia luzea dute zuzeneko emanaldietan, gure inguruko musikari askorekin jo dute-eta: Benito Lertxundi, Gozategi, Olatz Zugasti… Kontzertuak eman dituzte, besteak beste, Heineken Jazzaldian, Kutxa Kultur Festibalean, Surfilm Festival jaialdian… 2017an Foru Aldundiak bultzatutako Katapulta Tour zirkuituan parte hartzeko aukeratu zituzten.
Iaz aurkeztu zuten beren hirugarren diskoa: “Ulu”(2018ko iraila), zazpi kanta biltzen dituena.
