Udalak iaz egindako kirol-diagnosiak garbi erakutsi ditu Orioko eskola-kirolak, gauza onekin batera —parte-hartze maila handia, eskaintza ugaria…—, badituela gabeziak ere: begiraleen prestakuntza-maila eskasa, egitura ahula, finantzaketa urria… Hori dela-eta, Udalak eta kirol-eragileek gaiari buruzko gogoeta-prozesu bat abiatu zuten aurtengo maiatzean, indarrean daukagun eredua egokitzeko gaur egungo gizartearen nahi eta premietara.
Orioko Udalak antolatuta eta OinHerri Herri Hezitzaileak elkarteak dinamizatuta, hiru gogoeta-saio ireki egin ziren 2024ko maiatzean eta ekainean. Guztira, 14 lagunek parte hartu zuten: bi ikastetxeetako koordinatzaileak, gurasoak, Udaleko hezkuntza- eta kirol-teknikariak, zinegotziak eta kirol-elkarte batzuk. Saio horietan gaur egungo eskola-kirol ereduaren indarguneak eta ahulguneak aztertu ziren eta aurrera begirako zenbait gako identifikatu ziren.
Hiru gogoeta-saioetan landutakoaren emaitza txosten honetan jasota dago: Eskola-kirolaren eredu berria lantzen. 2024-2025 (PDF)
Gogoeta kolektibo horren ondoren, talde motor bat eratu dute Udalak eta kirol-eragileek ikasturtearen hasieran, gaia lantzen jarraitzeko. Taldeak helburu hauxe jarri dio bere buruari: ikasturte honetan gaia landu ondoren, 2025-2026 ikasturtean eskola-kirol eredu berri bat abiatzea Orion.
Hauek izango dira eskola-kiroleko talde motorraren eginkizunak 2024-25 ikasturte honetan:
- Gaur egungo egoerari buruzko informazioa biltzea galdetegien bidez.
- Eskola-kiroleko eredu ezberdinak ezagutu eta aztertzea.
- Prozesuan eta programan herriko beste eragileak inplikatzea.
- Kirol-programa bateratu bat diseinatzea Orioko haur guztientzat, gaur egungo eskola-kirolak eta kirol-eskolak modu koordinatuan bilduko dituena.
- Begiraleentzako lan-baldintza duinak bermatuko dituen egitasmoa proposatzea.
- Eskola-kirol eredu berriaren aurreikuspen ekonomikoa egitea.
Talde motorra oraintxe jarri da martxan eta zortzi bat hilabetez ariko da lanean, ikasturtea bukatu arte. Bitartean, kontrasteak egingo ditu kirol-eragileekin, prozesuaren norabidea egokitzeko.
Hasteko, informazioa biltzeko galdetegiak prestatu ditu talde motorrak, jakiteko, batetik, ikasleek, gurasoek eta begiraleek nola baloratzen duten gaur egungo eskola-kirol eredua, eta, bestetik, nolako hobekuntzak proposatzen dituzten.
Udalak datorren astean zabalduko ditu galdetegiak, interesatuek erantzuteko.
