Eskualdeko hainbat herritan (Zarautz, Zumaia…) ugaritu egin dira azken aldian etxeetan egindako lapurretak. Hori dela-eta, Ertzaintzak ohar bat kaleratu du herri horietan zabaltzeko. Zarautzen, esaterako, herriko portaletan jarri du oharra, jendeari kontuz ibiltzea eskatzeko (ikusi irudia).
Orion ez dugu sumatu horrelako lapurretak ugaritu direnik; baina, hala ere, neurri prebentibo gisa, Udalak erabaki du ohar hau publikatzea, herritarrak kontzientziatzeko, beti ondo dator-eta oinarrizko aholkuak gogoraraztea.
Oinarrizko aholkuak
Etxeetako lapurretak prebenitzeko, hiru oinarrizko aholku ematen ditu Ertzaintzak kaleratu duen oharrak:
- Aterik ez irekitzea ezezagunei. Inoiz ez zabaldu atea ezezagunei, eta eduki beti itxita bai etxeko atea eta bai portalekoa.
- Atea beti giltzatuta utzi. Etxetik denbora gutxirako baldin bazoaz ere, eta segituan etortzea pentsatzen baduzu ere, BETI itxi atea giltzarekin.
- Autoarekin garajetik ateratzerakoan, begiratu ispilutik ea norbait sartzen den.
Deitu udaltzaingora edo Ertzaintzara
Susmoren bat izanez gero, deitu Orioko udaltzaingora (943 830 028) edo Zarauzko Ertzainetxera (943 538 900).
