Martxoaren 8ko deklarazio instituzionala

2014KO MARTXOAK 8. ADIERAZPENA

Nahiz eta XXI. mendean sartuta egon, oraindik asko falta da gizonen eta emakumeen eskubide sozialen benetako berdintasunera iristeko. Ezberdintasun sozialek egiturazko oinarriak dituzte, sozietatearen egitura ideologikoan, ekonomikoan eta politikoan oinarrituta daudenak.

Gizon eta emakumeen arteko aukera-berdintasuna lortzeko lanetan hausnarketarako eguna da martxoaren 8an ospatzen den Emakumeen Eskubideen Nazioarteko Eguna, lan horiekiko konpromisoa berresteko eta erronka berriak ezartzeko. Baina, egun konkretu baten aldarrikatzen diren eskubideak eguneroko jardun zehatzetan gauzatuz egin behar da aurrera.

Asko aurreratu da azken hamarkada hauetan, hau da, 60. eta 70. hamarkadetan mendebaldeko munduko emakumeek mundu gerren ondorioz baztertuta zegoen diskurtso feminista berreskuratu zutenetik gaur egun esparru eta arlo gehienetara iritsi diren emakumeen aldarrikapenak hedatzera. Baina askotan hedapen hori azalekoa da, itxurak ez darama berekin sakontasuna.

2013ko udaberriaren atarian Orioko udalak, urtebete lehenago herriko hainbat eragileekin hasi zuen lanketa baten ondorioz, 13 helburu eta 53 neurri konkretuekin, Berdintasunerako I Plana osatu zuen.

Berdintasunaren I Planak 4 ardatz estrategiko hartzen ditu:
– Emakume eta gizonen egoera, baldintza eta beharrizan desberdinak kontutan harturik helburu eta ekintza desberdinak sortu emakume eta gizonen arteko desberdintasun egoerak desagerrarazteko.

– Jabekuntza eta balio aldaketa emakumearen autonomia sustatzea eta beraren egoera sendotzea eskatzen du arlo publikoan eta erabakiak hartzerako orduan.

– Gizarte antolakuntza erantzunkidearen bitartez bizitza pertsonala, familia artekoa eta lanekoa bateratzea lortu nahi da gizonen erantzunkidetasunaren bitartez, etxeko lanetan, lan estrukturen moldaketa etab.

– Genero-indarkeriaren aurka borrokatzeko neurri eta baliabideak erraztu.

Oinarri teorikoez ondo hornituta aurrera goaz eta praktikara eramateko jauzian abiadura azkartzeko denok eman behar dugu gure bultzadatxoa.

Adierazpen honekin Orioko Udalak bat egiten du martxoaren 8an ospatzen den Emakumeen Eskubideen Nazioarteko Eguneko aldarrikapenekin.