Herriko eremu batzuetan —batez ere, denda txikien ingurutan— mugatuta dago aparkatzeko denbora, autoz datozen herritarrek aukera izan dezaten aparkatu eta beren erosketak egiteko.
Aparkatzeko denbora kontrolatzen ibiltzen diren udaltzainak beste zeregin batzuetan ari dira orain, nahitaezko konfinamenduak sortu duen egoera kudeatzen, eta, kontrol-falta hori aprobetxatuta, herritar batzuek aparkatzeko eremu mugatuetan uzten dute autoa eguna joan eta eguna etorri.
Erosketak egiteko aparkatu ezinik
Portaera desegoki hori dela-eta, autoarekin herriko dendetara erosketak egitera datozenak (Anibarko Portutik, hondartzatik, Santiagoerreka auzotik…) askotan suertatzen dira aparkatu ezinik propio beren premietarako pentsatutako aparkalekuetan.
Arauak bete eta autoak kentzeko eskaera
Udalak herritarrei gogorarazten die aparkaldi mugatuko eremuak indarrean segitzen duela eta, beraz, debekatuta dagoela bertan denbora luzez aparkatzea. Hortaz, herritarrei eskatzen die autoak mugitzeko mugatutako eremutik, hartara, erosketak egitera datozenek aukera izan dezaten eremu horretan aparkatzeko. Hori da aparkaldi mugatuko eremuaren funtzioa eta guztiok jokatu behar dugu arduraz eta arauak bete.
Herrian badaude beste eremu batzuk ibilgailuak nahi adina denboran aparkatzeko eta horiek erabiltzea eskatzen die Udalak herritarrei.
