Bihar, urriaren 27an, asteartea, Kuantika / Quantum Capsule kanpaina ibiltaria Oriora iritsiko da. Eusko Jaurlaritzako Zientzia, Unibertsitate eta Berrikuntza Sailak sustatutako ekimenak mekanika eta teknologia kuantikoa herritarrengana modu ulergarri eta erakargarrian hurbiltzea du helburu. Horretarako, berariaz egokitutako unitate mugikor bat jarriko da Abaromendi kalean, hondartzako bidean.
Bertan, bisitariek fisika kuantikoaren oinarrizko kontzeptuak eta gaur egungo aplikazioak ezagutzeko aukera izango dute, bisita gidatuen, ikus-entzunezko eduki murgiltzaileen eta esperientzia interaktiboen bidez. Besteak beste, gainjartzea, ziurgabetasuna, korapilatze kuantikoa eta konputazio kuantikoa landuko dira.
Jarduera euskaraz eta gaztelaniaz eskainiko da, eta ikastetxeei, familiei, elkarteei eta, oro har, herritar guztiei zuzenduta egongo da. Bisitariak langile espezializatuek gidatuko dituzte, eta unitateak irisgarritasun-neurriak izango ditu, premia espezifikoak dituzten pertsonen parte-hartzea errazteko.
Jarduera publikoa eta doakoa izango da, eta unitate mugikorra 09:00etatik 14:00etara eta 16:00etatik 19:00etara egongo da eskuragarri Abaromendi kalean.
Orioko bisita Euskal Autonomia Erkidego osoan egingo den kanpaina zabalago baten parte da. Bederatzi hilabete inguruan, ekimenak Araba, Bizkaia eta Gipuzkoako 147 udalerri bisitatzea eta guztira 190 jardunaldi egitea aurreikusten du.