Urriaren 2tik 4ra ospatuko den Parrilla Festari amaiera emateko, Marmitakoa eta Txakolin Eguna izango dira igandean, urriaren 4an, Herriko Plazan. Eguerdian hasiko da jardunaldia, eta bertako gastronomiaz gozatzeko aukera izango dute herritarrek, ohiko marmitakoa, herriko tabernen errazioak eta inguruko txakolinak dastatuz.
Aldapa elkartearen marmitakoa eta herriko tabernen errazioak
Aldapa elkartea arduratuko da ohiko marmitakoa prestatzeaz, eta 12:30etik aurrera banatuko dira errazioak, bakoitza 4 euroan. Herriko Plazan mahaiak jarriko dira, bertaratzen direnek marmitakoa bertan eta eserita jan ahal izan dezaten.
Marmitakoaz gain, herriko tabernek ere parte hartuko dute jardunaldian, bestelako errazioak prestatuz eta plazan salgai jarriz. Hala, herritarrek hainbat jaki dastatzeko eta elkarrekin bazkaltzeko aukera izango dute.
Inguruko lau ekoizleren txakolinak dastatzeko aukera
Marmitakoarekin batera, Txakolin Eguna ere ospatuko da Herriko Plazan. Inguruko lau ekoizlek hartuko dute parte: Bodega Katxina, Blai Txakolindegia, Arbela Txakolina eta Zudugarai Txakolina.
Sei euroren truke, lau txakolindegietako txakolin-trago bana dastatzeko aukera izango da. Horrela, bertako ekoizleen produktuak ezagutarazi eta inguruko txakolinen eskaintza herritarrengana hurbilduko da.
Parrilla Festari amaiera emateko hitzordua
Marmitakoa eta Txakolin Eguna izango dira urriaren 2tik 4ra ospatuko den Parrilla Festaren azken eguneko ekitaldiak. Aurten bigarren aldiz antolatu du Orioko Udalak festa, herriko eragileekin elkarlanean, Orioko ondare gastronomikoa ospatzeko, ezagutarazteko eta belaunaldiz belaunaldi transmititzeko helburuarekin.
Hiru eguneko egitarauan, herriko parrilleroek, tabernek, arrain-saltzaileek eta txakolin-ekoizleek protagonismo berezia izango dute. Ostiralean, urriaren 2an, parrillak piztu eta sasoiko arrainen pintxo-potea egingo da. Larunbatean, berriz, Herriko Plaza elkarte gastronomiko erraldoi bihurtuko da, eta herritarrek arraina Orioko modura erretzen ikasteko aukera izango dute, herriko parrilleroen laguntzarekin. Igandeko Marmitakoa eta Txakolin Egunarekin emango zaio amaiera aurtengo edizioari.