Euskaldun zaharrak behar dira Mintzalagun programarako

Ikasturte berriarekin batera, Urola Kostako Udal Elkarteak Mintzalagun egitasmoa jarri du martxan berriro, Aia, Getaria, Orio, Zarautz eta Zumaiako udalekin batera. Zerbitzua mankomunitateak ordaintzen du eta AEK-k gestionatzen du.

Orion euskaldun zaharrak beharko dira, taldeak osatzeko

Aurten jende askok eman du izena euskaltegian Orion, euskara ikasteko; eta, beraz, AEKren aurreikuspena da mintzalagun taldeak ere ugaritu egingo direla. Hori dela-eta, euskaldun zahar gehiago beharko dira taldeak osatzeko. Udalak dei egiten die herriko euskaltzaleei izena eman eta programan parte hartzeko; eskatzen den konpromisoa txikia da: astean ordubetez, bakoitzari ondoen datorkion orduan, euskara praktikatu nahi duten herritarrekin bildu, talde txikian, eta haiekin euskaraz aritzea. Edozein euskaldunek egin dezake, eta ez da behar ikasketa edo gaitasun berezirik; lagun arteko hizketa da mintzalaguneko kideek landu nahi dutena.

Izen-ematea

Izena eman nahi dutenek hiru bide hauetakoren bat erabil dezakete:

  • Kosta tailerreko euskaltegira jo eta AEK-ko irakasle batekin hitz egin
  • Telefonoz deitu eskualdeko arduradunari (Eukene): 625 485 215
  • Mezua idatzi emailez: urolakosta@aek.org

Izena emateko epea irekita dago dagoeneko eta taldeak urriaren erdi alderako osatu nahi ditu AEK-k.

Zer da Mintzalagun programa?

Mintzalagun Programak euskaraz dakiten pertsonak (bidelagunak, euskaldun zaharrak) euskara ikasten ari direnekin (bidelariekin) elkartzen ditu astean ordubetez euskaraz hitz egin dezaten. Zer lortzen dugu:

  • Bidelariak, euskaldun berriak: euskaraz hitz egiteko aukera du, bertako hizkera ezagutu eta ikasteko; jendea ezagutzeko eta euskaraz aritzeko harreman-sarea zabaltzeko aukera ematen dio programak.
  • Bidelagunak, euskaldun zaharrak: euskaldun berriei lagundu, bertako hizkera erakutsi, egiten ari diren ahalegina saritu eta aitortu…

Urtero, Urola Kostan, 20 bat talde osatzen dira, astero juntatzen direnak euskaraz aritzeko (taldeak 2-5 pertsonakoak dira), guztira 75 lagun inguru.