Hori erakusten du azken neurketak.
Orioko Udaleko Euskara Zerbitzuak bi urtetik behin egiten du euskararen erabileraren neurketa kalean eta aurtengoak ondorio garbi hau utzi du: euskararen erabilera jaitsi egin da, batez ere helduen artean.
Euskara Zerbitzuak ia hogeita bost urte daramatza euskararen erabilera neurtzen herriko kaleetan. Hasieran, urtero egiten zen neurketa eta azken hamabost urteotan, berriz, bi urtez behin. Neurketa beti maiatzean egiten da, garai eta ordu berdinetan, datuak elkarren artean konparagarriak izateko.
Neurketa egiterakoan, kalean dabilen jende guztiaren jarduna apuntatzen da: zein ari den euskaraz, zein gaztelaniaz edo beste hizkuntzaren batean, emakumezkoak ala gizonezkoak diren, zein adin-taldetan sailkatzen diren eta abar.
AURTENGO NEURKETA
Erabileraren aurtengo neurketa maiatzaren 15etik 19ra egin zen eta herriko bi gazte ibili ziren lan horretan. Guztira, 3.997 herritarren hizkuntz jarduna neurtu zuten asteazkenetik igandera bitartean, bizitza sozialeko hainbat jardueratan: erosketak egiten, paseatzen, txikiteoan…
Lagina edo muestra hain zabala denez, emaitzak fidagarritasun handikoak dira, errore-marjina txiki batekin.
EMAITZAK
Emaitza nagusiak hauek izan dira: Orioko kaleetan dabiltzan haurren % 88,50ek egiten du euskaraz; gazteen artean ere erabilera-maila berdina da: % 88,55ekoa; helduek % 55,87 egiten dute euskaraz eta zaharrek, azkenik, % 69,59.
Guztira, adin-talde denak kontuan hartuta, euskararen erabilera-maila % 66,37koa da. Orain dela bi urte baino 7 puntu gutxiago.
