Urtero bezala, Orioko Udalak eta UEMAk kanpaina abiatu dute elkarlanean, oriotarrak animatzeko errenta-aitorpena euskaraz egitera. Apirilaren 8tik uztailaren 1era bitartean da aurtengo errenta-kanpaina Gipuzkoan.
Udalak herritarrak animatu nahi ditu Ogasunarekin euskaraz egitera; eta, hartara, bide batez, administrazioaren euskalduntzea bultzatzeko.
Errenta-aitorpena euskaraz egin nahi duenak oso erraza du:
- Aitorpena errenta mekanizatuko bulegoan egiten baduzu, esan hango langileari aurrerantzean euskaraz nahi duzula eta berehala aldatuko dizu.
- Internet bidez egiten baduzu, zerorrek aldatu behar duzu plataforman: Datu pertsonalak > Administrazioarekin harremana izateko hizkuntza > Euskara.
- Gestoria batean egiten baduzu, eskatu gestoreari aldatu egin nahi duzula.
- Azkenik, herritarren gehiengo handi batek autolikidazio-proposamena jasotzen du gaur egun. Autolikidazioa onartzerakoan (telefonoz deituta edo internet bidez), euskaraz nahi duzula esaten baduzu, hortik aurrera hala etorriko zaizkizu Ogasunarekiko komunikazioak, zuk bestelakorik erabaki arte.
![](https://orio.eus/wp-content/uploads/2024/04/ErrentaBI23.jpg)
Urtez urte gehiago
Beheko taulan ikusi daitekeenez, oriotar gero eta gehiagok egiten du errenta-aitorpena euskaraz; baina, oraindik ere, gehiago dira gaztelaniaz egiten dutenak. Udalaren helburua da urtez urte datu horiek hobetzen joatea.
Iazko kanpainan, esaterako, 1.052 oriotarrek egin zuen aitorpena euskaraz, inoiz baino gehiago (egindako guztien %31,4).
![](https://orio.eus/wp-content/uploads/2024/04/Errenta22.jpg)