Albisteak

Orioko pobreziari buruzko txostena aurkeztuko du Udalak kultur etxean azaroaren 12an

2018an, Orioko pobreziari buruzko azterketa egin zuen SIADECO Ikerketa Elkarteak, Udalaren enkarguz. Pobrezia, desberdintasunak eta gizarte-bazterketa aztertu zituzten Orion. Horretarako, gaiaren inguruan Europa osoan erabili ohi diren adierazleei buruzko informazio kuantitatiboa bildu zuen, inkesten bidez. Ondoren, metodologia kualitatiboak erabili zituen informazio hori osatzeko eta herriko informatzaile kualifikatuen azalpenak eta hausnarketak jasotzeko.

Egindako lana 'Pobrezia, desberdintasuna eta gizarte-bazterketa Orion' izeneko txostenean jaso zuen SIADECOk eta Udaleko Gizarte Ongizate batzordeari aurkeztu zion.

Gauzak ondo bidean, ostiral arratsalderako izango da berriz martxan kultur etxearen atzeko igogailua

Kultur etxearen atzeko igogailua matxuratuta egon da egun batzuetan eta gaur goizean hasi dira langileak konponketa-lanak egiten, behin beharrezko materialak iritsi direnean.

Gauzak ondo bidean, gaur eta bihar artean konponduko dute eta, beraz, ostiral arratsalderako erabilgarri izango da berriro igogailua.

Benito Lertxundiren kantaldia izango da Orion azaroaren 16an, larunbatarekin

Benito Lertxundik kantaldia egingo du Orioko Karela kiroldegian, azaroaren 16an, 22:00etan hasita.

Kantaita Enea musika-promotoreak antolatu du kantaldia, Orioko Udalaren laguntzarekin.

Sarrerak salgai

Sarrerak salgai daude dagoeneko, Orioko bi tokitan (Kutixi kafetegian eta Ontza paper-dendan) eta interneten:

https://entradium.com/eu/events/benito-lertxundi-orion

Aldez aurretik erosita, 22 eurotan dago sarrera; egunean bertan erosiz gero, berriz, 25 eurotan.

Hurrengo ostiralean bukatuko da epea, 'Euskaraz Gazte' literatur lehiaketara lanak aurkezteko

Udalak 16 urtetik gorako herritarrentzat antolatzen duen 'Euskaraz Gazte' literatur lehiaketan lanak aurkezteko epea 2019ko azaroaren 15ean bukatuko da, ostiralarekin. Lanak Orioko Euskara Zerbitzuan edo Aiako kultur etxean aurkeztu daitezke.

1.700 euro daude saritan, lanik onenen artean banatzeko.

Orioko Arraunetxen egingo da ‘Euskara eta turismoa: aukerak eta arretaguneak’ jardunaldia, azaroaren 21ean

Euskara eta turismoa nola uztartu eta euskara turismo eskaintzan nola eta zertarako nabarmendu aztertzeko jardunaldia izango da, udalerri euskaldunetako herri turistikoenetan azken urteotan sortutako kezkak aztertzeko, hausnarketak partekatzeko eta lanerako ildo berriak zehazteko.

UEMAk eta Udako Euskal Unibertsitateak antolatu dute, Orioko Udalaren laguntzarekin.

Aurkezpena Koldo Mitxelena kulturgunean

Gaur goizean aurkeztu dute jardunaldia, Donostiako Koldo Mitxelena kulturgunean eta bertan izan da, besteak beste, Anuska Esnal Orioko alkatea.

Galiboa jarri du Udalak, baina moilako zirkulazio-aldaketa ez da egingo, azkenean, datorren astera arte

Udalak gaur zuen asmoa plaza inguruko zirkulazioa aldatzeko eta moilako bidea bi noranzkotan jartzeko, baina, eguraldia dela-eta, atzeratu egin du datorren astera arte.

Gaur goizean pintatzekoak ziren lurreko marrak, arratsaldean zirkulazio-aldaketa egiteko, baina, euria dela-eta, ezin izan dituzte pintatu. Datozen egunotan ere eguraldi euritsua dago iragarrita eta, beraz, Udalak datorren artera atzeratu ditu pintaketa-lanak.

Galiboa jarrita

Nolanahi ere, galiboa jarrita dago dagoeneko eta, beraz, 2,40 m-tik gorako altuera duten ibilgailuek Txanka-Hondartzako bidea erabili beharko dute aurrerantzean, herritik ateratzeko. Galiboa instalatuta dagoela adierazten duten seinaleak jarri ditu Udalak goizean herriko hainbat tokitan, gidariak jakinaren gainean izateko (ikusi irudia).