Udalak 30.000 euroko dirulaguntza emango dio Urolako Komunikazio Taldeari

Orioko alkateak eta Urolako Komunikazio Taldearen (UKT) ordezkari Uxua Ostolazak lankidetza-hitzarmena sinatu dute gaur goizean, udaletxean. Horren arabera, Udalak 30.000 euroko dirulaguntza emango dio aurten UKT kooperatibari, eskualdean euskarazko komunikazio-zerbitzuak garatu eta emateko.

Karkara Taldeak eta eskualdeko beste komunikabide batzuek elkar hartuta, UKT kooperatiba osatu zuten iaz. Geroztik, kooperatiba hori bihurtu da gure eskualdeko komunikazio-talderik garrantzizkoena. UKTk hainbat idatzizko komunikabide argitaratzen ditu euskaraz eskualdeko herrietan: Karkara, Uztarria, Baleike, Hitza egunkaria… eta bere baitan du, baita ere, Erlo telebista, ikus-entzunezko alorrean.

Dendari eta tabernariek bete beharreko baldintza batzuk aldatu egingo dira deskonfinamenduaren 2. fasean

Gauzak ondo bidean, deskonfinamenduaren 2. fasean sartuko da EAE datorren maiatzaren 25etik aurrera. Hala baldin bada, horrek aldaketak ekarriko ditu herriko dendari eta tabernarien jardunean, orain arte baino baldintza malguagoak izango dituzte-eta.

Dagoeneko 2. fasean dauden eremuetan aplikatu diren neurriak kontuan hartuta, aldaketa nagusiak hauek izango dira (betiere, dekretuak zehaztuko duenaren eta Eusko Jaurlaritzak ezar ditzakeen bestelako neurrien zain):

  • Dendetan aforoaren %40 onartuko da (1. fasean %30 zen), betiere bi metroko segurtasun-distantzia mantentzeko modurik baldin badago.
  • Taberna eta jatetxeetan aukera izango dute lokalaren barruko mahaietan zerbitzatzeko (orain arte terrazatan bakarrik zerbitzatu behar zuten), aforoaren %40 arte.

Zorionak dendariei

Udala pozik dago herriko dendariek ateak irekitzeko eta zerbitzua emateko egiten ari diren ahaleginagatik, eta zorionak eman nahi dizkie ezarritako segurtasun- eta higiene-baldintzak zorrotz eta arduraz betetzen ari direlako.

Konfinamendua arinago izango da gaurtik aurrera

Deskonfinamenduaren lehen fasean segitzen dugu Hego Euskal Herrian, baina, gaurtik aurrera, hainbat neurri aplikatzen ari dira, etxealdia arintzeko. Hauek dira garrantzizkoenak:

Udalak eta OinHerri elkarteak elkarlanean aritzeko hitzarmena sinatu dute

Orioko Udalak eta OinHerri Herri Hezitzaileak elkarteak lankidetza-hitzarmena sinatu dute. Hitzarmenaren helburua da elkarlanerako markoa finkatzea, OinHerri elkartearen helburu, printzipio eta lan-ildoak Orion garatzeko.

Hitzarmena urtebeterako sinatu dute eta, bi aldeak ados agertuz gero, urtez urte luzatu ahal izango da legeak ezartzen dituen mugen barruan. Hitzarmenaren arabera, Udalak 3.000 euroko dirulaguntza emango dio OinHerri Herri Hezitzaileak elkarteari, bere jarduera eta proiektuak finantzatzeko eta Orion bere printzipio eta lan-ildoak garatzeko, hezkuntzako eragileekin elkarlanean.

Udalak eta herriko bi ikastetxeek bat egin dute Homofobiaren Kontrako Nazioarteko Egunarekin

Urola Kostako Hezkidetza Foroak proposatuta, Udalak eta eskualdeko ikastetxeek bat egin dute aurten ere Homofobiaren Kontrako Nazioarteko Egunarekin. Beti maiatzaren 17an egiten da eta aurten igandearekin tokatu da.

Covid-19: segurtasunari buruzko on-line saioak antolatu ditu Udal Elkarteak merkatari eta ostalarientzat

COVID-19ak sortu duen egoeraren aurrean, Urola Kostako Udal Elkarteak ikastaro bat antolatu du on-line, eskualdeko merkatari, ostalari eta zerbitzuetako profesionalentzat, indarrean diren araudi eta protokoloak ezagutzeko eta sektore bakoitzak hartu beharreko neurrien berri jasotzeko. Establezimendu bakoitzean zer segurtasun- eta prebentzio-neurri hartu behar diren landuko da ikastaroan.

Muntoko behin-behineko aparkalekua itxi egingo du Udalak

Udalak itxi egingo du Muntoko partzelako behin-behineko aparkalekua (irudian horiz markatuta dagoena), ostegun honetatik hasita.

Eusko Jaurlaritzarekin sinatutako hitzarmenaren arabera, harena da orain aparkalekuko lurra. Babes ofizialeko alokairuzko etxeak egingo ditu Jaurlaritzak orube horretan. Obra hasteko, 2022a izango da gutxienez, baina Jaurlaritzak orube hori ja libratzeko eskatu dio Udalari, bertan isuri kaltegarririk ez izateko eta lurra ahalik eta garbien egoteko lanak hasten direnerako. Udalak, beraz, orube horretako behin-behineko aparkalekua ixtea erabaki du.

Itxaspeko bidea irekita izango da ostera oinezkoentzat eta bizikletazaleentzat, asteazkenetik aurrera

Itxaspeko bidea konpontzeko egiten ari ziren lanak bukatuta, asteazkenean irekiko da berriro, oinezkoentzat eta bizikletazaleentzat. Obrak otsailaren 25ean hasi ziren eta orain bukatu dira. Lehenago bukatzekoak ziren berez, baina COVID-19ak sortutako egoerak luzatu egin ditu.

Errepidearen ezponda sendotu egin du Udalak sei puntutan, mikropiloteak erabiliz, eta, horrez gain, bi eskoilera egin eta zati batzuk berrasfaltatu ditu.

Ostegun honetan azoka egingo da berriro, segurtasun-neurriak hartuta

Osteguneko azoka ikastola aurreko zabalgunean egingo da, goizeko 8:30etik 14:00etara. Azokak sarrera-puntu bat eta irteera-puntu bat izango ditu eta bezeroek hesiz markatutako ibilbide bati segituz bisitatu beharko dituzte postuak, honako segurtasun-neurriak hartuta:

  • Bezeroek eta saltzaileek maskara jantzi beharko dute nahitaez.
  • Azokara sartu aurretik eta ateratzerakoan, eskuak garbituko dituzte Udalak jarriko dituen xaboi-banagailuak erabiliz.
  • Elkarren arteko segurtasun-distantzia gorde beharko dute bezeroek nahiz saltzaileek(bi metro).
  • ‹Saltzaile bat, bezero bat› araua aplikatuko da uneoro. Gainontzeko bezeroek txandaren zain egon beharko dute, hesiaren bestaldean.
  • Bezeroek galarazita izango dute jeneroa eskuz ukitzea.

Herriko merkatari eta ostalariak hasita daude berriro zerbitzua ematen

Herriko dendari gehienek zabaldu dituzte ateak dagoeneko eta terrazak dituzten tabernari batzuk ere atzoko egunez hasi ziren zerbitzua ematen, segurtasun-neurriak hartuta bezeroen osasuna zaintzeko.

Ostalaritzako zerbitzuei dagokienez, taberna hauek ireki dituzte terrazak dagoeneko:

Zabalik daude ostera igogailu publikoak eta komun publikoak

Osasun-arrazoiengatik hainbat astez itxita egon ondoren, gaur jarri dira erabilgarri ostera herriko bi igogailu publikoak (plazakoa eta kultur etxearen atzekoa). Herritarrek hainbat neurri bete beharko dituzte igogailuak erabili ahal izateko:

  • Sartu aurretik eskuak garbitu beharko dituzte, Udalak ate ondoan jarri duen xaboiarekin.
  • Igogailua erabiltzeko, maskara jantzi behar da nahitaez
  • Igogailua bakarka erabili behar da, arau orokor gisa
  • Zaintza behar duten pertsonek zaindariarekin erabili dezakete eta elkarrekin bizi diren pertsonak ere batera igo daitezke

Deskonfinamenduaren lehen faseak aldaketak ekarriko ditu herriko zerbitzuetan

Datorren astelehenetik aurrera deskonfinamenduaren lehen fasean sartuko gara, eta horrek zenbait aldaketa ekarriko ditu. Aldaketa nagusiak zein diren azaldu nahi du Udalak ohar honen bidez.

Udaletxea

  • Egoera ez da aldatuko. Udaletxeak itxita segituko du, baina herritarrek aukera izango dute hitzordua eskatzeko, beharrezko tramiteak egiteko edo udal-teknikari edo politikariekin geratzeko.
  • Udalak manparak jarri ditu herritarrak hartzeko lanpostuetan eta eskuak garbitzeko gel-banagailua jarri du udaletxeko sarreran, gainerako eraikin publikoetan bezala.