Urtero bezala, Herrio natur taldeak jostailu erabiliak trukatzeko azoka antolatu du. Aurtengoa azokaren zortzigarren edizioa da.
JOSTAILUEN BILKETA
Azoka eguna baino lehen jostailuen bilketa egingo da.
- Abenduaren 1ean, ostiralarekin, Zaragueta eskolan izango dira, 16:00etatik 17:00etara; eta ikastolan, 16:30etik 17:30era.
- Abenduaren 15ean, ostiralarekin, Herriko Plazan izango dira, 17:00etatik 19:00etara.
Trukatzeko jostailu erabiliak dauzkaten herritarrak, hortaz, bi egun horietakoren batean joan daitezke, dagokion lekura, beren jostailuak uztera.
JOSTAILUAK TRUKATZEKO EGUNA
Behin jostailu erabiliak jasota, horiek trukatzeko, Herriok postu bat jarriko du Herriko Plazan edo pilotalekuan (eguraldiaren arabera), abenduaren 16an, larunbatarekin,10:30etik 14:30era.
TRUKE SISTEMA
Bilketa egunetan etxetik ekarritako jostailuak sailkatu egingo dituzte hiru koloreren arabera: horia, urdina edo gorria. Nahi izanez gero koloretako txartel bat jasoko dute gurasoek azoka egunean kolore berdineko txartela duen beste jostailuren batengatik trukatzeko. Mahaietako jostailuak begiratu eta gustukoena aukeratzea izango dute.
Azokara hurbiltzen direnek aukera izango dute, egun berean, etxetik ekarritako jostailuak azokan jarritakoekin trukatzeko.
HELBURUAK ETA PARTE HARTZEKO BALDINTZAK
Elkartrukea eta berrerabilpena sustatzea da azokaren helburua eta Gabonetako gehiegizko kontsumoaz ardura hartzea.
Ekimen honetan parte hartu ahal izateko baldintza hauek bete beharko dira:
- Jostailuak osorik egon behar dute, egoera onean. Norberari hartzea gustatuko litzaiokeen moduan. Egoera txarrean dagoen jostailurik ez da jasoko.
- Azoka egunean jostailuak trukatzeko, 8 urtetik beherakoek arduradun batekin parte hartu beharko dute.
- Behin azoka amaitutakoan inork eraman ez dituen jostailuak irabazi asmorik gabeko erakunde batera bideratuko dira.
